له پخوا وختونو راهیسې د افغانستان ملت د پاکستان په اصلي څېره ښه پوهېدلی او هغه یې په رښتینې معنی خپل دښمن ګڼلی دی؛ داسې دښمن چې د خپل شوم او منحوس تأسیس راهیسې یې تر اوسه پورې دې خاورې او ملت ته د زیان رسولو لپاره له هېڅ ډول هڅو او کوښښونو ډډه نه ده کړې.
د پاکستان له ورانونکو او تخریبي سیاستونو څخه د افغانستان د ملت ژوره کرکه او نفرت د دې لامل شوی چې په هر وخت کې سیاستوال او حتی هغه جنګ سالاران چې خپله د پاکستان په لاس روزل شوي وو، د افغانستان د خلکو په منځ کې د ځان منلو لپاره خپل دښمنان په پاکستان پورې تړلي معرفي کړي او هڅه یې کړې له دې لارې خپل ځان ته څه نا څه مشروعیت تر لاسه کړي.
له همدې امله، د پخواني جمهوریت په وخت کې ټول وخت سیاستوالو له استثنا پرته طالبان د پاکستان لاسپوڅي بالل او له دې لارې یې غوښتل چې د دې خاورې اصلي بچیان د خپلو خلکو په وړاندې بې اعتباره او بې ارزښته کړي؛ په داسې حال کې چې افغانستان ته د امریکا د یرغل په وخت کې اسلامي امارت تر ټولو ډېر زیان د پاکستان له لوري ولید.
پر طالبانو دا بې بنسټه تورونه په داسې حال کې لګول کېدل، چې که د هر بدنامه جنګ سالار تېرو کړنو او مخینې ته لږ ځير شو، بې له شکه به د پاکستان د آی ایس آی نښې د هغوی په ژوند کې ومومو.
په وروستیو څو ورځو کې داسې ښکاري چې د پاکستان حکومت یو ځل بیا د خپلو ناوړه پلانونو او موخو د پلي کولو لپاره خپلو پخوانیو مهرو او لاسپوڅو ته مخه کړې او له هغوی سره یې څو ځلې ناستې پاستې او لیدنې – کتنې ترسره کړې دي.
په دې منځ کې، د مقاومت جبهه لومړنۍ اجیره جبهه و چې د پاکستان د آی ایس آی مشر په تاجکستان کې د هغوی خوا ته ورغلی او بدنامه لارویان یې د هېواد او خپلو خلکو سره د خیانت لپاره چمتو او تیار کړل. د مقاومت جبهې د غړو له خوا د ډیورنډ کرښې د په رسمیت پېژندلو اعتراف، تر ټولو لوی او غټ ثبوت دی.
د هغه راپورونو له مخې چې د هندوکش غږ له خوا خپاره شوي، د پاکستان آی ایس آی د خپلو پخوانیو اجیرانو او لاسپوڅو د جلب او جذب لپاره لاس په کار شوي او یو لوړپوړی پلاوی یې ترکیې ته د پخواني حکومت له چارواکو او په بهر کې د مخالفینو د جبهو له مشرانو سره د لیدو لپاره لېږلی و.
هندوکش غږ همدارنګه هغو معلوماتو ته لاسرسی پیدا کړی و، چې ښيي په دې لیدنه کې له احمد مسعود، عبدالرشید دوستم، صلاحالدین رباني، عبدالرب رسول سیاف، کریم خلیلي، محمد محقق او څو نورو څېرو سره د نویو هوکړو او تړونونو په اړه خبرې کېدلې؛ هغه کسان چې د پاکستان له حکومت سره د دښمنۍ له ادعا سره، سره یې اوس د خپلو ګټو او موخو د تر لاسه کولو لپاره د پاکستان د غلامۍ پړی غاړې ته اچولی.
هغه څه چې د یادونې وړ دي؛ دا چې د دې وطن پلورونکو او خائنینو اصلي څېره ټولو ته ښکاره شوې ده، دوی د دې خاورې د دښمنانو له سوځېدلو مهرو پرته نور څه نه دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.