د ټولګټو چارو وزارت ویاند محمد اشرف حق شناس وایي، تېره اوونۍ (د ۱۴۰۴ کال د چنګاښ مياشتي له ۱۳مې څخه د همدې میاشتې تر ۱۹مې) نېټې پورې د یاد وزارت د اوسپنې پټلۍ له لارې ۷۷ زره او ۲۹ مټریک ټنه انتقالات شوي دي.
د ښاغلي حق شناس په وینا، د حیرتان بندر له لارې ۵۸ زره او ۸۵۰ ټنه، د آقینې بندر له لارې شپږ زره او ۷۵۰ ټنه، د تورغونډۍ بندر له لارې پنځه زره او ۴۳۸ ټنه او د خواف–هرات له لارې پنځه زره او ۹۹۶ ټنه انتقالات شوي، چې ټولټال ۷۷ زره او ۲۹ مټریک ټنه کېږي.
حقشنای زیاتوي، چې د انتقالاتو له ډلې ۴۶۴ ټنه صادرات دي چې لویه برخه یې وچه مېوه او د انارو جوس دي.
ورته مهال نوموړي ډاډ ورکړی، چې ټولګټو وزارت هڅه کوي، ترڅو د لا زیاتو انتقالاتو لپاره مناسب شرایط برابر او سوداګرو ته اړین سهولتونه چمتو کړي.