د احصایې او معلوماتو ملي اداره وايي، چې د روان کال د تېرې لړم میاشتې په اوږدو کې د هېواد له هوايي ډګرونو او ځمکنیو بندرونو څخه ۲۷۶۸ بهرنيو وګړو تګ او راتګ کړی دی.
د دې ادارې د معلوماتو له مخې، په دې موده کې (۱۴۲۶) بهرني وګړي چې پکې (۶۲) ښځې هم شاملې دي، هېواد ته داخل شوي، همدارنګه (۱۳۴۲) نور بهرنيان چې پکې (۲۴) ښځې دي، له هېواده وتلي دي.
سرچينه وايي، په ټوله کې تېره مياشت (۱۴۰۷) تنه د ځمکنیو بندرونو له لارې او (۱۹) تنه نور د هوا له لارې هېواد ته راغلي، چې له دې شمېرې څخه (۱۶۴) کسان د افغانستان د تاریخي او لرغونو سیمو د لیدنې او پاتې نور د کار په موخه داخل شوي دي.
د ثبت شويو ارقامو له مخې، تر ټولو ډېر (۱۰۵۲) بهرني وګړي د نیمروز بندر له لارې، ورپسې (۲۸۸) تنه د هرات د ځمکنیو بندرونو له لارې، (۵۵) تنه د فاریاب د اقینې بندر له لارې او (۳۱) تنه نور بيا د حیرتان بندر او د بلخ هوايي ډګر له لارې هېواد ته داخل شوي دي.