د کلیو بیارغونې او پراختیا وزارت مسئولینو د امارتي ادارو د يو کلنو لاسته راوړنو د تشريح په خبري کنفرانس کې وویل: په تېر یوه کال کې د هېواد په کچه، د ۱ میلیارډ افغانیو په ټولیز ارزښت، د اوبو رسولو ۲۶۶ پروژو د تطبیق پایله کې، ۱ میلیون ۵۲۵ زره او ۴۰۰ کسانو د څښاک پاکو اوبو ته لاسرسی پیدا کړی دی. دغه راز، د اوبو رسولو د ۱۴۹ پروژو چارې دوام لري، چې په بشپړېدو سره به یې ۶۶۴ زره او ۹۱۶ کسان د څښاک له پاکو اوبو څخه برخمن شي.
د وزارت مسئولینو زیاته کړه، چې په وروستي یوه کال کې په بادغیس، بغلان، بلخ، پروان، پکتیا، زابل، سرپل، فراه، کاپیسا، کندوز، نورستان، نیمروز او هرات ولایتونو کې د ۴۲۶ میلیونه افغانیو په ارزښت، د اوبو د ۱۰۰ کوچنيو بندونو او چکډمونو چارې بشپړې او ګټې اخیستې ته سپارل شوي دي.
همدارنګه د وزارت د چارواکو په وینا، په دې وروستیو کې د ۲۳ ولایتونو په ۵۱ ولسوالیو کې په سلګونو کیلومتره سړکونه جوړ شوي او په بېلابېلو ولایتونو کې د ۳۸۸ کیلومتره سړکونو د جوړولو چارې دوام لري. د دې تر څنګ، د بدخشان ولایت په واخان ولسوالۍ کې د ۵۰ کیلومتره سړک د جوړولو چارې هم دوام لري. دغه سړک افغانستان له چین سره نښلوي.
د وزارت چارواکي د خپلو خبرو په دوام زیاتوي، چې په نیمروز ولایت کې د کج ستار بند د جوړولو پروژې د امکان سنجونې مطالعه او د فراه ولایت، ګلستان ولسوالۍ کې د اوبو بند د ډیزاین چارې روانې دي چې په نېږدې راتلونکي کې به یې ساختماني کار هم پیل شي. د ګلستان ولسوالۍ د اوبو بند ۱۴۰ میلیون متر مکعب اوبه زېرمه کوي، چې په چخانسور، خاشرود او دلارام ولسوالیو کې په ټولیز ډول د ۱۴ زره هکټاره کرنیزې ځمکې د خړوبولو وړتیا لري.
همدارنګه، د بادغیس ولایت په قادس ولسوالۍ کې د ۲.۵ میلیونه امریکایي ډالرو په ټولیز ارزښت، د اوبو بند جوړېږي، چې د دې پروژې په تطبیق سره به، ۱۴۰۰ هکټاره کرنیزه ځمکه تر اوبو لاندې او د سیمې اوسېدونکي به هم د څښاک اوبو ته لاسرسي پیدا کړي. همداراز، د ۳۳۵ میلیونه افغانیو په ارزښت، د قلعه نو د اوبو رسولو شبکې د جوړولو چارو ۸۵ سلنه پرمختګ کړی، چې د دې پروژې په بشپړېدو سره به، د سیمې ۶۵ زره اوسېدونکي د څښاک پاکو اوبو ته لاسرسی پیدا کړي.
د کلیو بیارغونې او پراختیا وزارت د معلوماتو پر بنسټ، د ۷۵ میلیونه افغانیو په ټولیز ارزښت، د کندهار ولایت په سپین بولدک ولسوالۍ کې د ۵ کیلومتره استنادي دېوال جوړولو چارو ۹۵ سلنه پرمختګ کړی دی. دغه پروژه د کلیو بیارغونې او پراختیا وزارت له مهمو پروژو څخه ده، چې په تطبیق سره به یې سلګونه زره هکټاره کرنیزه ځمکه د موسمي سېلابونو له زیانونو څخه خوندي شي.