د پرځېدلي جمهوريت د پارلمان وکیل او د هزاره قوم یو له اوسنیو مشرانو جعفر مهدوي، د افغانستان انټرنشنال په نوم د یوې تلویزیوني شبکې راپور چې ګواکې د امربالمعروف، نهې عن المنکر او شکایتونو اورېدلو وزارت سرپرست له ده سره په لیدنه کې د ښځو له خپلسرو نیونو دفاع کړې، رد کړې او دا یې ناسم د خپلو خبرو ناسم تعبیر بللی دی.
ښاغلي مهدوي پر خپل اېکس ادرس د انټرنېشنل د پوسټ له بیا خپراوي سره لیکلي: «له بده مرغه د امر بالمعروف له وزیر سره مې د ناستې راپور، چې تېره ورځ مې پر خپله اېکسپاڼه خپور کړ، ناسم تعبیر شوی دی.»
د افغانستان انټرنېشنل په نوم دې تلویزیوني شبکې چې ظاهرا له امریکا او لندن څخه خپرونې کوي او پرې اسرائیلي استخباراتو ته د کار کولو تور پورې دی، تېره ورځ خبر خپور کړ، چې د پخواني پارلمان د یوه استازي له شکایت وروسته د امربالمعروف وزیر د حجاب د نه رعایت کولو له امله د ښځو د نیونې او ځورونې په برخه کې د محتسبینو له چلند څخه دفاع کړې ده.
ښاغلي مهدوي لیکلي، چې په دغه ناسته کې ښاغلي حنفي او د اړوند برخو رئیسانو د دې موضوع په اړه ورته بشپړ معلومات وړاندې کړي او له ښځو سره یې هر راز بد چلند په کلکه رد کړی دی.