جنسیتي اپارتايد هغه حالت دی، چې په کې د جنسیت پر اساس خلکو ته مختلف حقوق او فرصتونه ورکول کېږي؛ دې ته اشاره لري چې ښځې او نارینه په یوه ټولنه کې په نابرابرو شرایطو کې ژوند کوي چې د ښځو په وړاندې د تبعیض، ظلم او نابرابري شاملېږي؛ دا ډول اپارتايد ممکن په قانوني، ټولنیز او اقتصادي برخو کې وي، چې د ښځو او نارینه وو ترمنځ حقوقو او امکاناتو کې توپیرونه رامنځته کوي.
غربیان په دې پوهېږي چې د ښځو فساد د ټولې ټولنې فساد او اصلاح یې د ټولې ټولنې اصلاح ده؛ له همدې امله امریکایانو او نورو غربي اشغالګرو د جمهوریت په وخت کې د ښځو د چارو د وزارت په نامه د اشغال په حکومت کې يو رسمي اورګان جوړ کړ، چې د افغانستان په تاریخ کې کله هم په دې نامه کوم وزارت وجود نه درلود.
دغه وزارت په منظم او سیستماتیک ډول ښځې د خپل دين، خپلو شرعي مکلفیتونو او د خپلې ټولني د عنعناتو او اعتقاداتو په ضد را پارولې؛ وزارتونه خو په اصل کې د هېوادونو د چارو د چلولو او د ستونزو د حل لپاره منځ ته راځي، خو اوس پوښتنه دا ده؛ چې آيا ښځه توب هم کومه داسې چاره او یا کومه ستونزه ده، چې د يوه مستقل وزارت ضرورت ايجابوي؟ او که هغه هم د نارینه توب په څېر یو فطري امر دی، چې د انسانیت په عمومي دائره کې راځي، چې بايد ټول وزارتونه او ادارې يې پالنه وکړي!؟
که هدف دا وي، چې ښځې د هېواد په چارو کې استخدام شي او د دوی په اند د يوې سيکولرې ټولنې د رامنځته کولو لپاره ترې کار واخيستل شي، نو دا کار خو دوی په نورو وزارتونو کې هم کولی شو؛ او که هدف دا وي چې ښځه توب هم يو خاصه چاره ده، چې د امریکایي مشاورینو تر نظارت لاندې د وزارت ضرورت لري، نو بيا خو ځينې افغانان ملامت نه وو، چې دغه وزارت ته یې(وزارت امور زنان پر ځای وزارت امور زنا) ویل، ځکه چې همدغه وزارت و، چې په زرګونو غربي مؤسسو ته ځوانې ښځينه ترجمانانې، سكرترانې او کار کوونکي یې برابرول، چې د نه اورېدلو کیسې یې هره ورځ د کابل د خلکو په منځ کې خپرېدلې.
جنسیتي اپارتايد هغه د رنګينو لومو دام دی، چې غربیانو په افغانستان کې د افغانو ښځو د ښکار کولو او په هغوی کې د غربي ډوله فرهنگ د رائجولو په مقصد را وړاندې کړ او په هغه کې يې څو داسې له اسلامي او افغاني فرهنگ څخه پردۍ شوې غرب پلوه ښځې توظيف کړې دي، چې د هغوی په وسیله په افغانستان کې د ښځو د فاسدولو لپاره د غرب پروگرامونه او پلانونه تطبيق کوي، له همدې امله خو دغه فاسد قشر خپل کارونه هم په ښارونو او د غرب د فکري تأثير قبلونې په ساحو کې متمركز كړي دي.
هغوی چې نن له خارج څخه اوسنی اسلامي حکومت په جنسیتي اپارتاید تورنوي، په حقیقت کې اکثریت د دوی له ډلې په جنسي قضیو کې ښکېل وو؛ دوی د افغان مېرمنو له نوم په استفادې یوازې ډالر اخلي.
د غرب شرمخانې د افغاني ټولنې په اړه داسې افکار را وړاندې کوي، تر څو دلته ښځې د جنسیتي اپارتاید احساس وکړي، او خپل ځان په ټولنه کې محدود او منفور وويني.
مریل ستریپ(د هالیووډ نانځکه) وایي:«په کابل کې د یوې ښځې په پرتله پیشو ډېره آزادي لري» دا جمله که په غور سره وکتل شي، قصداً د افغان پتمنو مېرمنو عفت ته لاس اوږدول دي، خو لله الحمد افغان مېرمنې اوس په دې پوهېدلې دي، چې دا ډول ارزښت(لکه مریل ستریپ چې ورکړی) خو ښځې ته غربي ټولنه ورکوي او ورکړی یې هم دی؛ په اسلامي ټولنه کې ښځه د خورا لوی عزت او شرافت څښتنه ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.