د سرپرست حکومت د ریاست الوزراء اداري مرستیال مولوي عبدالسلام حنفي نن له غرمې وړاندې د جوزجان ولایت په مرکز شبرغان ښار کې راستنېدونکو کډوالو ته نوی ښارګوټی پرانیستی.
ارګ په یوه خبرپاڼه کې ویلي چې د ریاست الوزراء اداري مرستیال د دې ښارګوټي د پرانیستې په مراسمو کې ویلي، د سرپرست حکومت مشران او مسؤلین کوښښ کوي چې راستنېدونکو هیوادوالو ته د هوساینې زمینه برابره او لازمې اسانتیاوې ورته چمتو کړي.
ښاغلي حنفي له ملي تاجرانو، شتمنو هېوادوالو او د اسلامي هېوادونو له خیریه بنسټونو څخه غوښتي چې له افغان کډوالو سره چې له ګاونډیو هیوادونو څخه په اجباري توګه را اېستل کېږي تر خپله وسه همکاري او مرسته وکړي.
د ارګ د خبر پاڼې له مخې یاد ښارګوټی دوه زره جریبه پراخوالی لري چې د ټولو ښاري امکاناتو په پام کې نیولو سره به مستحقو کډوالو ته د یوې رڼې پروسې له لارې وېشل کېږي.