د کورنیو چارو وزارت د پالیسۍ او ستراتېژۍ پخوانۍ مرستیاله حسنا جلیل وايي، د جمهوریت پر مهال ښځینه پولیسې له جنسي تېریو او جنسي ځورونو خوندي نه وې.
نوموړې په یوه مرکه کې ویلي، د ځانگړو ځواکونو، کمانډو او پولیسو په لیکو کې پر افغان ښځینه پولیسو جنسي تېري کېدل، چې پکې دخیل ټول لوړ پوړي چارواکي وو.
جلیل ویلي، د جمهوریت پر مهال هېڅ ښځینه کارکوونکې خوندي نه وې.:«حتا دا ستونزې په لوړو موقفونو کې هم وې؛ خو زموږ موقف او ځوکۍ حداقل له موږ څخه دفاع کولی شوه؛ خو ښځینه پولیسو هېڅ چاره نه لرله او شاوخوا ترې د لېوه په څېر حیوانات راتاو وو.»
د جمهوریت پر مهال د کورنیو چارو وزارت ښځینه پولیسې گمارلې وې؛ خو هغه وخت هم د جنسي تېریو او او جنسي ځورونو راپورونه ورکول کېدل.
پر افغان ښځینه پولیسو بېلابېلو نړیوالو او کورنیو رسنیو هم بېلابېل راپورونه جوړ کړي وو، چې گڼو ښځینه پولیسو ورته ویلي وو، چې له گڼو جنسي تېریو سره مخ شوي، خو د خپلې کورنۍ د بدنومۍ په خاطر غلې پاتې شوې دي.
حسنا جلیل د ۱۳۹۷/۰۹/۱۳مه د کورنیو چارو وزارت د پالیسۍ او ستراتېژۍ مرستیاله ټاکل شوې وه، چې د جمهوریت تر وروستیو په یاد بست پاتې شوه.