د ریاست الوزراء اداري مرستیال عبدالسلام حنفي د روان ۱۴۰۳ل کال د کانکور ازموینې غوره زدهکوونکو د ستاینې په پروگرام کې ویلي، چې هڅه کوي په هېواد کې افغان ځوانانو ته د زدهکړو بېلابېلې اسانتیاوې برابرې کړي.
له ارگ څخه په خپره شوې خبرپاڼه کې ویل شوي، ښاغلي حنفي یادو زدهکوونکو ته ویلي، اوس د هېواد د ابادۍ او پرمختگ وخت رارسېدلی او د افغانستان راتلونکی تاسو پورې اړه لري.: «خوښ يوو چې زموږ ځوانانو هم په اسلامي تعليماتو او هم په عمومي تعليماتو کې د لوړو نمرو په تر لاسه کولو سره افغان ملت ته وياړونه په برخه کړل، له همدې وجې دغو ځوانانو، د هغوی محترمو کورنيو، استادانو، د ازموينې ملي ادارې مسوولينو او ټولو هغو کسانو ته چې د هېواد د اولادونو د ښوونې او روزنې په برخه کې سهيم دي، مبارکي وايو.»
د خبرپاڼې له مخې، نوموړي یادو زدهکوونکو ته ویلي چې اوسمهال په هېواد کې بشپړ امن دی او د همدغه امن له برکته دې ځوانان هېواد د پرمختگ په لوري روان کړي.: «موږ په ټولو برخو کې متخصصينو ته اړتيا لرو او هيله ده چې په راتلونکې کې ستاسو له منځه علماء، پوهان، ډاکتران، انجينران، حقوقپوهان، اقتصادپوهان او وړ اشخاص ټولنې ته وړاندې شي.»
ښاغلي حنفي یادو زدهکوونکو ته ویلي، حکومت هڅه کوي چې د هېواد د پوهنتونونو په بېلابېلو تحصیلي څانگونو کې د دوکتورا برنامې فعاله کړو؛ څو زموږ ځوانان وکولی شي په کور دننه خپلو تخصصي زدهکړو ته دوام ورکړي.: «اسلامي امارت هڅه کوي چې د هېواد اولادونه په صحيح او سمه توگه زدهکړې وکړي او زموږ گران هېواد او خلکو ته گټور ثابت شي.»
د سږني کانکور ممتاز زدهکوونکي تر دې مهاله د بېلابېلو ادارو له لوري ستایل شوي دي او ژمنه ورکړل شوې چې زدهکوونکو او محصلانو ته به په هېواد کې د زدهکړو ښه زمینه برابروي.