لیکوال: شمس الله شهير
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
په خواله رسنيو کې خبر تر سترګو کېږي، چې د امريکا د بهرنيو چارو وزارت وياند ويلي، دوی په افغانستان کې د وسلوالې مبارزې يا جګړې ملاتړ نه کوي.
په دې اړوند نورې خبرې هم شوې دي، خو دا برخه خبرې د هغوی لپاره بېخي د اټوم په شان دي، کوم چې د همدې بادار پرمټ د هوا له لارې پر افغانستان واکمن شول، دلته يې د قدرت جزاير رامنځته کړل، د ملت له وينو یې ميلياردونه ډالر ترلاسه کړل او هيواد يې د نورو د نیابتي جګړو په میدان بدل کړی وو.
درې کاله وړاندې د رب په نصرت، د اسلامي نظام د سپاهيانو په قربانيو او د ولس په ملاتړ دلته وروستۍ او دريمه امپراتورۍ امريکا او ناټو له ماتې سره مخ شوه؛ درې کاله کېږي چې ولس له يو قوي، مرکزي حکومت او سراسري امن سره د پرمختګ په حال کې دی.
خو د امريکايي بادارانو تر سیوري لاندې چاغ شوي او مطرح شوي پردي پال هم د خپلو بادارانو له ماتې سره له دې پاکې خطې د رب په نصرت او د ولس په قربانيو ورک شول.
دوی له دې ځایه له تښتېدلو سره له لاسه ورکړو خوندونو او لذتونو د بيا اعادې په موخه د شر او فساد په نومونو بيلابيلې ډلې د خپلو بادارانو په کور کې رامېنځه کړې.
دا ډلې د بيلابيلو اشخاصو لخوا د ځان مطرح والي، بادارانو ته د بيا غلامۍ او د هيواد د شته امنيت او پرمختګ د لمنځه وړلو لپاره رامنځته شوې، چې د ملي مقاومت، د افغانستان ازادۍ او متحدې په نومونو د جبهو يادونه کولای شو.
دوی يوازې خيالي او ميډيايې شتون ښودلی او په عمل کې يې که په تېرو دريو کلنو کې هم سر را پورته کړی وو، له را پورته والي سره ځپل شوي او له شر او فساد يې دا خاوره پاکه او ساتل شوې ده.
خو دې ټولو د اولې ورځې د ايجاد څخه دا هيله وه، چې خپل اصلي بادار امريکا به يې ملاتړ کوي او د همدوی په ملاتړ به بيا د پراشوټ له لارې افغانستان کې واک ترلاسه کوي او د بادارانو خدمت ته به دوام ورکوي.
خو دا درې کاله يې دا هيلې د وخت په تېرېدو سره د پوره کېدو په ځای د لمنځه تللو او په يو خيال او محال د بدلېدو په درشل کې دي.
له روسېې، چين او نورو خو يې له اوله هيلې پرې وې، خو څو مياشتې وړاندې یې انګلستان هم ډيرې هيلې ور پرې کړې، هغوی اعلان کړی وو چې د هيڅ هغې وسلوالې ډلې ملاتړ نه کوي چې د افغانستان واکمن حکومت په وړاندې وسلواله مبارزه ترسره کوي، په يادو خبرو سره د دوی ټولې هيلې او تمې امريکا ته پاتې شوې.
خو د امريکا لخوا بيا د دوی نه ملاتړ د دوی د لمنځه تګ او هرڅه په میډیا کې د انلاين مقاومتو او ډلو پورې منحصره پاتې کېدو په حال کې ښکاري.
دا دی درې کاله وروسته امريکا بيا د اشغال پرمهال د سترو شويو ډلو ټپلو او خیالي مقاوموتونو هيلې په اوبو ور لاهو کړې او داسې ښکاري چې د دوی هرڅه يوازې تر ميډيا پورې منحصر شول او په عمل کې يې انجام په تېرو دريو کلنو کې ښه معلومولای شو.