ليکوال: عبدالله زاهد
دا چې له څو لسيزو څخه افغانان په جګړه کې ښکېل وه او هر خواته وژنې وې نو د افغانانو پر خوله يوه غوښتنه وه چې هغه د جګړې خاتمه او يو سولييز ماحول وو؛ چې له هر اختر مخکې به هر ځلي افغانانو د اوربند خواست کاوه چې رب يې ږغ واورېد او د افغانستان اسلامي امارت د همېشني اوربند په تحفه سره و نازول.
کله چې طالبان بريالي راغله؛ د نړۍ سوپر ځواکونه يې د خپلو متحدينو سره پر ګونډو کړه او افغانان يې د آزادۍ په ستر نعمت، د سولې په تحفه ونازول، ټول هغه افغانان چې تېر نظام کې يې کار کاوه، د امريکايانو غلامي يې کلونه کړې وه، د ولس او د طالبانو په سپېڅلو وينو يې بد رنګه لاسونه ککړ وه؛ د اسلامي ترحم په خاطر اميرالمؤمنين د رحم او شفقت لاس پر سر ور تېر کړ، عمومي عفوه يې ورته وکړه چې په دې کار سره يې د اسلام ستر او سپېڅلې دين او د طالبانو سپېڅلې لار لا هم وځلول.
د خپلو مخالفينو تېره هره کړنه يې ورته معاف کړه، هغه طالب چې ورور به يې د تېر نظام نظاميانو ور شهيد کړی وو، پلار به يې ورته شهيد کړی وو خو وروسته تر فتحې يې د اميرالمؤمنين د اطاعت په خاطر هيڅ هم نه دي ويلي؛ بلکې همغه د مجاهد د ورور او پلار و قريبانو قاتل ته په کلي کې ګوري مګر هيڅ هم نه ورته وايي، که څه هم واک سرتاسري د طالب جان دی.
دغه ستر کار او وينه بهېدل د اميرالمؤمنين په يوه امر سره ودرېده او وروسته له فتحې څخه هر اختر مو يو سولييز او د ورورګلوۍ په ماحول کې لمانځو چې دا د رب ستره تحفه ده د افغانانو لپاره.
دغه د ورورګلوۍ او سولييز اختر او دغه ماحول چې افغانانو ته رب د اسلامي امارت مشرانو په ذريعه تحفه کړ له هغه وخته د اسلام او افغانانو و افغانستان دښمنان سخت فکرمند سوي؛ ځکه وروسته له څو لسيزو جګړو څخه دغسي يو دم بد بيني او دښمني ورکېدل، وينه تويېدل درول او يو دم ورورګلوي منځته راوړل د نړۍ د سياسيونو او نظامونو له توقع خلاف کار وو؛ ځکه نړيوالو هيڅکله نه غوښتل چې افغانان دي دغسي ماحول ولري.
نړيوال بيخي حيران سوه چې څنګه داسي امکان لري او د حيرانتيا سره_ سره وارخطاء سوي هم دي ځکه چې افغانستان کې وينه درول د دوی پروژې په خطر کې اچولو په معنا دي، افغانستان د دوی د جګړو ميدان ګرځېدلی وو؛ د افغانانو وينه باندي تجارت يې کاروبار ګرځېدلی وو ځکه اوس هم په دې هڅه کې دي چې له افغانانو دغه امن، په آزاده فضاء کې سولييز او اسلامي ماحول او خوشحالي ترې واخلي.
نن که افغانستان کې د شپې يا هم د ورځې له خوا له بدخشانه تر کندهاره څوک سفر کوي، ميلې کوي او افغان ولسونه يو له بل سره ويني، مبارکۍ يو و بل ته ورکوي او مينه خپروي له هيڅ مشکله سره به مخ نه سي ځکه سرتاسري امن دی، ورورګلوي ده؛ خو همدغه ولسونه پرون د ځينو خرڅ سوو مشرانو او غلامانو په خاطر يو د بل د وينو تږې وه، يو له بل څخه يې کرکه درلوده، پښتون و تاجک، هزاره و ازبک په نامه سره وېشل سوي وه، د جنوب و شمال، کابلي و هراتي په نامه سره وېشل سوي وه.
همدغه شمالي ټلواله او د پښتنو ځينو غلامانو په وجه تعصب اوج ته رسېدلی وو خو نن الحمدلله ټول ولسونه يو و بل ته غاړې ورکوي، خواږه مجلسونه، مېلمستياوې او اخترونه سره لمانځي؛ له شمال څخه جنوب ته مېلوال راځي او له جنوب څخه شمال ته، ټول وطن کې د خوشحالۍ او امن يو داسي ماحول دی چې افغانانو يې تصور هم نه سوای کولای؛ الحمدلله او نړۍ مننه د اسلامي امارت له ټولو مشرانو او نظاميانو څخه.
امیرالمؤمنین د اختريز پېغام په لوستلو سره مې يو عجيب احساس وکړ ځکه هغه سپېڅلی ځواک او آمر يې چې کلونه يې د خپلو سرونو په نذرانه کولو سره کفارو ته سخته ماتې ورکړې؛ هغوی نن هوسايي نه کوي بلکې د ولس د هوساينې، ښيرازۍ او حقوقو لپاره شپه و ورځ مصروفه او نه ستړېدونکې مبارزه کوي.
اميرالمؤمنين پخپل اختريز پيغام کې پر خپل نظام ږغ کوي چې د ولس او تجارانو د هوساينې لپاره لا ډېر زيات کار وکړي، سوالګرو ته تنخواوې ټاکل سوي، معيوبينو ته تنخوا او ورسره هر ډول مرستې سوي.
په داسې يوه حالت کې چې نړۍ مو نه په رسميت پېژني او له بنديزونو سره هم مخ يو خو د علماء کرامو په نظام کې داسې اقتصادي پرمختګ ته يې نړۍ هم حيرانه ده؛ چې په داسې يوه حالت کې د ايران او پاکستان له خوا لکونه مهاجر هم په زور پرې را اړول سوي چې شايد ډېر جوړ هېوادونه د دغسي يو دم مهاجرو د راتګ مهارول په وسه نه وي اما د افغانستان اسلامي امارت و توانېدی چې په ښه شکل سره يې مهار او خپل وطن کې ځای پر ځای کړي؛ هر ډول مرستې يې ورسره کړي چې اوس هغه مهاجرين چې خپل وطن ته راغلي د امن څخه خوند اخلي او خپل وطن کې ښه او خوشحاله ژوند لري.
امیرالمؤمنین په خپل اختريز پيغام کې پر افغانانو د لا اتفاق او اتحاد ږغ کړی، ويلي يې: راځئ چې په ګډه سره د دغه اسلامي نظام تر شاه ودرېږو او د افغانستان د لا پرمختګ په برخه کې خپل کوښښونه جاري وساتو!امیرالمؤمنین په خپل اختريز پيغام کې په فلسطين کې د ماشومانو، زنانه او سپين ږيرو قتل عام د اسرائيلي صهيونيستي نظام له طرفه په کلکو ټکو غندلی.
رب دې د افغانستان اسلامي امارت او افغانانو ته دومره قوت ورکړي چې د نړۍ ستر وحشيانو ته ځواب و وايي او د نړۍ مسلمه امت د دوی له شره په امان کې کړي؛ لکه څنګه يې چې افغان ولس د دوی له ظلمونو او جبر څخه خلاص کړي.
رب مو دي دغه امن همېشنی، دغه ورورګلوي او د مينې او آزاده فضا و خپلواکي همېشنۍ کړي؛ رب دې مو دغه مشران سرلوړي لري تر څو دغسي مو د بهر او داخل له هر دښمن او فتنې څخه ساتي.
تل دې زنده باد وي اسلامي امارت او زموږ زړور سرتيري چې شپه و ورځ يې زموږ خدمت او امنيت راوستلو کې پر ځان يوه کړې؛ د اختر خوږې شپې يې زموږ د امن په خاطر تر موږ قربان کړي.
ګلونه ور په غاړه د اختر مبارکي ورکړئ، مننه له خپلو زړورو سرتيرو څخه ضرور وکړئ!
د افغانستان د اسلامي امارت له مشرانو او زړورو اتلانو، فدايانو څخه يو جهان مننه چې ځانونه يې زموږ دفاع، آزادۍ او د اسلام راتګ کې قربان کړي او اتلان مو لا هم شپه و ورځ خدمت کې ولاړ دي.
نو افغان ولسه، خوشحاله اختر ولرئ، طاعات او عبادات مو د رب دربار کې قبول او مقبول سه!