د احصایې او معلوماتو ملي ادارې مسؤلينو نن ورځ د دغې ادارې د يو کلنو لاسته راوړنو د تشريح پروګرام ته ويلي، چې تېر کال یې په ټول هېواد کې، څه باندې ۱.۴ ميليونه برښنایي پېژندپاڼې وېشلي، چې له ډلې یې شاوخوا ۶۰۰ زره په ښځو پورې اړه لري او په دې سره د ټولو وېشل شويو برښنایي پېژندپاڼو شمېر څه باندې ۱۶ ميليونو ته رسېدلی دی.
د يادې ادارې لوی رئيس عبدالظاهر حاجي ادريس زياته کړې، چې دغې ادارې تېر کال پنځه مهمې سروېګانې ترسره کړي، چې د لوګر ولايت د کليو نوملړ جوړونې، د کجکي بند د استملاک شوې ساحې، د کرنيزو ساحو د تثبيت، د پنبې د تولید او د روغتیا ملي سروېګانې پکې شاملې دي.
د احصایې او معلوماتو ملي ادارې د مسؤلينو په خبره تېر کال د افغانستان د صادراتو ارزښت څه باندې ۱.۷ ميليارده ډالره او د وارداتو ارزښت شاوخوا ۱۱.۷ ميليارده ډالرو ته رسېدلی، چې د صادراتو عمده توکي، انځر، پنبه، مميز، هنګ او سکاره دي او زياتره یې پاکستان، هند، متحده عربي اماراتو، ايران او ازبکستان هېوادونو ته صادر شوي دي.
دغې ادارې همدا راز زياته کړې، چې تېر کال د بنسټيزي اصلاحاتو، انکشافي پروژو د تطبيق او عامه خدمتونو د کيفيت لوړولو برخه کې مهمې لاسته راوړنې لري.