د استخباراتو لوی ریاست رئیس مولوي عبدالحق وثیق له الجزیرې نړیوالې شبکې سره په ځانګړې مرکه کې ویلي، چې افغانستان کې د داعش او نورو ډلو پر وړاندې اغېزمنه استخباراتي مبارزه ترسره شوې ده.
ښاغلي وثیق زیاته کړې، چې په تېر یو کال کې هغه ټول پټ عوامل چې د دښمن د استخباراتي کړیو لخوا د قومونو او بېلابېلو اقشارو تر منځ د اختلافاتو د رامنځته کولو په هدف رامنځته شوي وو، له منځه وړل شوي دي.
هغه دغه راز د اقتصادي سبوتاژ د مخنیوي لپاره اغېزناکو فعالیتونو د ترسره کېدو خبر ورکړی او ټینګار یې کړی، چې پر کابل د ا.ا.ا له بیا واکمنېدو راوروسته د مافیایي کړیو فعالیتونه تر ډېره حده له منځه تللي او ګراف یې نږدې صفر ته رسېدلی دی.
نوموړې ویلي، چې پورته ټولې لاسته راوړنې د ولس د ښې همکارۍ او له استخباراتو څخه د بشپړ ملاتړ په نتیجه کې ترلاسه شوي دي او په خبره یې: «د استخباراتو په تاریخ کې هېڅ استخباراتي سازمان د اسلامي امارت د استخباراتو په څېر د ولس په منځ کې ځای نه دی موندلی.»