دفاع وزارت په خپره شوې خبرپاڼه کې وايي چې د افغانستان اسلامي امارت د مشرتابه په حضور او د ریاست الوزراء اقتصادي او اداري مرستیالانو سربېره د کورنیو چارو، بهرنیو چارو، امربالمعروف، حج او اوقافو محترمو وزیرصاحبانو او د استخبارتو لوی ریاست عمومي رئیس په شتون کې د نفس اصلاح، مسؤلیت پیژندنې، د قدرت په وخت کې ښه بندګي کول، لا زیاتې همغږۍ او ښې حکومتولۍ په موخه د (دفاع وزارت مسؤلینو لپاره اصلاحي غونډه) تر عنوان لاندې په کندهار ولایت کې د ۲۰۵ البدر قول اردو قوماندانۍ انګړ کې دری ورځنۍ سیمینار ترسره شو.
ياده خبرپاڼه کې راغلي: دا سیمینار د ملي دفاع وزارت د لوړ رتبه او عالي رتبه مسؤلینو د وزارت مرستیالانو، د نهه ګونو قول اردوګانو د قوماندانانو، مرستیالانو او درستیزوالانو، د لواء ګانو قوماندانانو، مرستیالانو او درستیزوالانو، د کنډکونو قوماندانانو، د مرکزي قطعاتو مرستیالانو او درستیزوالانو، د وزارت رئیسانو او د مرکزي او ساحوي قطعاتو ځینو برخو مدیرانو لپاره ترسره شو.
خبرپاڼه زياتوي چې: په یاد درې ورځني سيمينار کې د مشرتابه د وینا سربېره د قول اردوګانو د قوماندانانو او د وزارت مرستیالانو له خوا د بېلابېلو برخو د راپورونه وړاندې شول، او مشرتابه په ټول هیواد کې د امنیت په تامین کې د هیواد د دفاعي او امنیتي ځواکونو سرښندنې وستایلې او د اسلامي امارت د وروستیو لاسته راوړنو څخه یې یادونه وکړه او ویې ویل: تاسو نن ستر مسئولیت لرئ او هغه د اسلامي نظام ساتنه او استحکام دی، ګورئ چي په قدرت مغروره نشئ او د اطاعت په وړاندې هم د بې روحه جسد په څیر و اوسئ او د مشرانو د فرمانونو او امرونو تاویل مکوئ او استقامت وکړئ چي دا ستاسو لپاره جهاد دی.
خبرپاڼه همدارنګه زياتوي: د دغې غونډې دوهمه ورځ د علماء کرامو په ویناوو، د ملي دفاع وزارت د لومړي مرستیال، د وسله وال پوځ لوی درستیز او د ملي دفاع وزارت سرپرست مولوي محمد یعقوب «مجاهد» په وینا او همداراز په دغه سیمینار کې حاضر د کابینې محترمو غړو هر یو په وار سره په بېلابېلو موضوعاتو جهادي یادونو، ښې حکومتولۍ، د امنیتي ادارو ترمنځ همغږي، د مشرانو اطاعت، د نیت اصلاح، د بیت المال ساتنه، اسلامي ورورولۍ او د اسلامي امارت د لاسته راوړنو په اړه ویناوې وکړې.
خبر پاڼه زياتوي چې د غونډې په وروستۍ ورځ مشرتابه د ښې حکومتولۍ، د امراوو څخه اطاعت او د علماء د احترام په اړه ویناو وکړه او د مسؤليت پېژندنې په اړه یې وویل: د هر مسؤلیت علم پر هغه مسؤل باندې فرض دی او په هر هغه شي چې تاسو ته یې مسؤلیت درکړل شي علم یې باید زده کړئ، سیمه يیز تبعیض پریږدئ ځکه چې اختلاف او بې اعتمادي ستاسو د ماتې سبب ګرځي.
د ملي دفاع وزارت په وار وار د دفاعي ځواکونو لپاره اصلاحي او تربيتي غونډې جوړوي او په وينا یې موخه یې د خپلو ځواکونو اسلامي او ديني روحيه لا پياوړي کول او دوی خپلو مسوليتونو ته متوجه کول دي.