لیکوال: منصور أحرار
الله جل جلاله د افغانستان پر خلکو رنګارنګ او بې شمېره انعامات کړي دي، چې شمېر یې د انسان په وس کې نه دی، چې له جملې یې یو انعام د بې مثاله امنیت، اسلامي نظام او د کلیمې تر سپین محمدي توغ لاندې ژوند تېرول دي؛ دا هغه انعام دی چې کلونه کلونه یې مونږ ارمان درلود او د دې ارمان په ترلاسه کولو کې مو بې شمېره او بې ساري قربانۍ ورکړې چې بالآخره الله جل جلاله دا انعام هم پر افغان ملت ولوروه.
ولسونه هغه وخت نېکمرغه بلل کېږي چې اسلامي نظام او مسلمان سپاهیان ولري، هغوی نېکمرغه نه دي چې د کفر او الحاد تر چتر لاندې د ذلت ژوند تېروي؛ زمونږ ولسونه به ډېر ناشکره وي چې اوس هم پر خپل حال افتخار نه کوي او د مسلمان نظام تر شا نه درېږي، باید په هر حالت او هر تکلیف کې د خپل مسلمان نظام او مسلمان سپاهیانو دفاع وکړي.
اوس که د دې نعمت (ډاډمن امنیت، اسلامي نظام او تر سپین محمدي توغ لاندې ژوند تېرول) ناشکري وشي، نو الله تعالی به یې خدای مکړه رانه واخلي، او له داسې ذلت سره به مخ شو چې د نورو لپاره له عبرت وګرځي، ځکه چا چې د نعمت ناشکري وکړه، هغه ته الله سبحانه وتعالی د عذاب ترڅنګ د دې نعمت زوال ور په برخه کوي.
په بني اسرائيلو باندې الله جل جلاله رنګارنګ انعامات وکړل، د فرعون ملعون له سختو او دردوونکو عذابونو څخه يې خلاص کړل، بحر قلزم يې ورته کوڅې کوڅې کړ او دوی پرې پورې وتل، د پاسه پرې ورېځو سوری کړی وو، له اسمانه ورته په دسترخوان کې تيار سره کړي مړزان او تورنجبيل چې يو قسم خواږه شيان دي راتلل، يخې چينې يې ورته جاري کړې وې له هغو يې اوبه څکلې، لنډه دا چې په تياره يې خوړل او څکل او د دنيا له ستومانۍ او تکليفونو نه بې غمه ګرځېدل، بلا تشبيه په دنيا کې يې د جنت غوندې د راحت زندګي تېروله.
خو دا چې هغو بدبختانو ناشکري وکړه، له الله سبحانه سره يې خوسی شريک وګاڼه او د هغه عبادت يې شروع کړ، د بهترينو اسماني غوښو په مقابل کې يې ادنا ترکاري وغوښته، د الله رب العزت احکامات يې و نه منل او له هغو يې سرغړونه وکړه، نو الله سبحانه وتعالی له داسې لوی ذلت سره مخامخ کړل چې تر قيامته پورې به د نورو انسانانو لپاره د عبرت سبق وي.
الله تعالی دوی مسخ کړل، ځيني يې خنزيران او ځينې يې بيزوګان شول؛ الله جل جلاله د دوی په اړه فرمايي: فَقُلْنَا لَهُمْ کُوْنُوْا قِرَدَةً خَاسِئِيْنَ، فَجَعَلنَاهَا نَکَالًا لِمَابَيْنَ يَدَيْهَا وَمَاخَلْفَهَا وَمَوْعِظَةً لِلْمُتّقِيْنَ (سورة البقرة ٦٥/٦٦).ژباړه: نو وويل مونږ دوی ته چې، شئ بيزوګان ذليلان خوار شوي؛ نو وګرځاوه مونږ دا (عقوبت او مسخه) عبرت/پند لپاره د هغو خلکو چې حاضر وو د دې عقوبت په زمانه کې، او لپاره د هغو خلکو چې وروسته له دې عقوبت څخه تر قيامته راځي او پند لپاره د پرهېزګارانو.
تاسو د تېر اختر په مناسبت د مثالي او ډاډمن امنیت پایله ولیده او لا یې وینئ چې افغان ولسونه په څومره ډاډمنه فضاء کې یو او بل ځای ته په مېلو او منظرو د خوشحالۍ په حالت کې ګرځي؛ دا اخترونه په نورو حکومتونو کې هم راتلل، هلته خو نه د چا مال خوندي وو او نه د چا ځان، نه چا چېرته منظرې او مېلې ته زړه ښه کاوه؛ دا که اوس هم شکر اداء نه شي نو خدای مکړه چې د بني اسرائيلو په برخلیک اخته نه شو.
بناءً د شته اسلامي نظام، ډاډمن امنیت او د سپېڅلې کلمې تر سپین توغ لاندې ژوند تېرول نعمت او غنیمت وګڼئ، د نظام مخالفین ورټئ، د نظام په مقابل کې د هر رنګه دسیسو مخه ونیسئ، ناشکري مه کوئ، ځکه داسې مثالي اسلامي نظامونه هر چا ته نه دي په برخه شوي، دا د الله رب العزت له لوري پر افغان ملت یو لوی انعام شوی دی (الحمدلله)، الله دې دا انعام له مونږ څخه نه اخلي، مونږ ایله اوس د ژوند په خوند پوه شوو.