د پنجشېر ولايت مقام مطبوعاتي دفتر په يوه خبرپاڼه کې وايي، چې د ۱۰ اسلامي هېوادونو ځينو علماوو او پانګه والو د پنجشېر له والي حافظ محمد اغا حکيم سره په ليدنه کې خبر ورکړی، چې د اسلامي هېوادونو ۲۵۰ شرکتونه او پانګه وال غواړي هر يو يې په افغانستان کې د ۹ سوه زره امریکايي ډالرو په ارزښت پانګونه وکړي.
سرچينه وايي، ياد پانګوال او علماء د قطر، سعودي، ترکيې، بحرین، عراق، عمان، مالیزیا، فلسطین، سوريې او هند هېوادونو څخه راغلي دي.
يادو علماوو او پانګوالو ويلي، چې سرپرست حکومت افغانستان ته د امنیت او ابادۍ نمونه ده او وروسته له پنځوسو کلونو يې په دې هېواد کې ډاډمن امنیت راوستی دی او په خبره یې اسلامي نړۍ باید د تبلیغاتو لاندې را نه شي او د افغانستان د سرپرست حکومت پر وړاندې خپل مسؤلیت ادا کړي.
د معلوماتو له مخې د یمن هېواد د علماوو شورا رئیس دوکتور عبدالله الزنداني د افغانستان امنیت بې مثاله یاد کړ او په وینا یې د افغانستان یو شمېر ولایتونه يې ليدلي او له شته ډاډمن امنیت څخه متاثره شوی دی.
له بل پلوه د قطر هېواد څخه راغلي پانګه وال محمد حسن العمادي هم بيا د توریزم او کرهڼې په برخو کې د خپلې پانګونې ډاډ ورکړی او افغانستان يې د پانګونې لپاره مناسب ګڼلی دی.
د پنجشېر ولايت مقام په خبرپاڼه کې همدا راز راغلي، چې یو تن یمني تجار او د اسلامي تمویل د هیئت رئیس خالد ويلي، چې پر داسې يوه پلان يې کار کړی او د افغانستان له حکومت سره يې شریک کړی، چې د اسلامي هېوادونو نږدې ۲۵۰ شرکتونه او پانګه وال په افغانستان کې پانګونه پیل کړي.
په ورته مهال د پنجشېر والي راغلو پانګوالو او علماوو ته د هر ډول همکارۍ ډاډ ورکړی دی.