ليکوال: عبدالله زاهد
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د حماس سياسي مشر اسماعيل هنيه پرون د چهار شنبې په ورځ د ۲۰۲۴ ميلادي کال د جولای پر ۳۱، د سهار ۲ بجې په ايران کې شهيد کړل شو؛ نوموړي د ايران د نوې ولسمشر مسعود پزشکيان د لوړې مراسمو کې ګډون کړی وو.
ايران او هم حماس د اسماعيل هنيه د شهادت د بدل اخيستلو ويلي چې ډېر ژر به د يهودو صهيونيستي نظام څخه د اسماعيل هنيه د شهادت بدله اخلي.
دا ناکامه خاموشي به د يهودو صهيونيستي رژيم او د نړۍ کفارو ته لا جرائت ورکوي، چې کله يې هم خوښه وي په هر اسلامي هېواد کې به د مسلمانانو مشران په نښه کوي او په هيڅ يو اسلامي هېواد کې به هيڅ مشر په امن کې نه وي.
له څو مياشتو څخه د فلسطيني مسلمانانو قتل عام شروع دی؛ اسرائيلي وحشيان نه ماشوم، نه سپين ږيری او نه هم زنانه ګوري بس له يوه مخه يې د فلسطينيانو وژلو ته کار ويلی چې نن يې په ايران کې د حماس د سياسي مشر اسماعيل هنيه هم په يوه بريد کې په شهادت و رساوه.
له يوې خوا د نړۍ ټول مسلمان ملت او ځيني کفارو هم د فلسطينيانو د قتل عام د درولو غوښتنه کړې خو بل طرف د ټولې نړۍ اسلامي واکداران خاموشه دي او غرب و ځيني نورې استخباراتي کړۍ بيا د اسرائيلو مرستې ته ملا تړلې تر څو لا ډېر فلسطينيان شهيدان کړي.
د هنيه شهادت به د حماس د آزادۍ روحيه لا پياوړې او د اسرائيلو صهيونيستي رژيم څخه به د هر جبر او ظلم بدله اخلي؛ ځکه له څو لسيزو څخه دغه ډله د يهودو مقابل جنګېږي چې په دغسي قربانيو سره لا قوي شوي.
دلته خبره د اسلامي هېوادونو او د مسلمان ملت پر ډلو وېشلو ده چې د نړۍ کفارو په دې بخش کې ډېر کار کړی، تر ډېره له همدې وسيلې په کار اخيستلو يې د مسلمانانو منځ کې نفاق جوړ کړی او وخت په وخت ترې کار اخلي؛ خو مسلمان هېوادونه پر ځای د دې چې يو موټي او د دوی مقابل راپورته شي؛ د دې پر ځای ځيني اسلامي هېوادونه د همدې کفري نړۍ سره د دوی د پروژو عملي کولو کې مرسته کوي.
اسماعيل هنيه لومړنی مشر نه دی چې د کفري نړۍ له خوا په شهادت رسېږي او که دغسي مسلمه امت پر ډلو وېشل شوی وو؛ نو دغه لړۍ به لا جريان ولري او يو، يو مشر او اتل به د مسلمانانو له منځه ځي خو هيڅوک به هيڅ هم نه شي کولای.
د مسلمانانو خپل منځي اختلافات خو ډېر دي اما د نړۍوالو ډېر تمرکز پر شيعه او سني مسلمان دی چې د دوی په منځ کې نفاق ته کار کوي؛ همدغه وجه ده چې اقليت د يهودو پر اکثريت عربو او مسلمانانو برلاسه دي؛ په ټول ۱.۹ ميليارده مسلمانانو يواځې ۱۵.۷ ميليونه يهود نه شي کنټرولولای؛ ځکه دوی همېش په خپلو کې سره اخته دي.
ځيني سني مسلمانان اوس پر شيعه مسلمانانو او ايران تورونه پوري کوي؛ د اسماعيل هنيه د شهادت پړه پر ايران اچوي خو دوی هېروي چې تر ننه کوم سني هېواد د فلسطين سره د يهودو مقابل مرسته نه ده کړې.
بلکې ډېر عربي او عجم هېوادونو خو په پټه د اسرائيلو سره لاس هم لري؛ بل طرف همدغه ايران دی چې له کلونو څخه د حماس او فلسطين مرسته کوي، همدغه ايران دی چې د دوی پر سر يې د يهودو او غرب دښمنۍ ته ټټر نيولی.
د عربو او د ايران مسئله پر شيعه او سني جوړه ده چې د دوی له دغه مخالفت څخه همېش کفري نړۍ ګټه پورته کړې؛ همدغه اور دوی تر افغانستانه هم را رسولی، دغه داعشيت افغانستان کې هم د همدې دښمنۍ يوه برخه ده.
همدغه عربستان، امريکا او يهود دي چې پاکستان ته د داعش پر روزلو او د دغې پروژې پر عملي کولو روپۍ ورکوي؛ تر څو دغه د سني او شيعه په نامه جګړه لا هم سيمه کې اوږده او کفار خپلې پروژې پرې عملي کړي.
دا چې له کلونو څخه ايران د حماس جهادي مبارزينو مرسته کوي او د يهودو سره يې دښمنۍ ته کار ويلی؛ بل طرف يهودو څو ځله دغسي کسان په ايران کې په شهادت رسولي؛ چې دا ځلي داسي ښکاري ايران به د ورته سخت عکس العمل تابيا نيسي او د يهودو مقابل به کوم سخت اقدام کوي.
د اسماعيل هنيه په شهادت ا.ا.ا او قطر هم خواشيني څرګنده کړې او دا يې يو جنايت بللی؛ د اسماعيل هنيه شهادت بايد د مسلمه امت د يو ځای کېدو وجه وګرځي؛ تر څو نړۍ ته وښيي چې موږ مسلمانان د خپلو ورونو او اسلامي ارزښتونو دفاع په هر حالت کې کولای شو.
فلسطينيانو او مسلمه امت يو مدبر، پوه او د اسلام يو ستر مبارز له لاسه ورکړ، رب دي يې شهادت قبول کړي؛ رب دې د نړۍ مسلمانان د يووالي او اتحاد په تحفه ونازوي تر څو په راتلونکي کې د دغسي هستيو دفاع وکولای شي.