کابو یوه اوونۍ وړاندې د شر او فساد لارویانو د خیالي جبهو، د منحل د مخنیوي لپاره “د افغانستان ژغورنې لپاره ملي مجمع” په نوم یوه خیالي او د جمهوریت په اډانه کې د راټولو شویو مفسدینو مشرانو هغه ډله جوړه او یوځای کړه، چې د ظلم، فساد او بربریت شواهد یې د هېواد په هر ګوټ کې موجود دي.
دا چې د دې جوړ شوي خیالي خوځښت یوه اوونۍ نه وه پوره شوې، اختلافات یې رسنیو ته راووتل؛ اسماعیل خان د حنیف اتمر له کړنو پرده پورته کړې او وایي، چې حامد کرزي د ځینو خلکو په راوستلو ځانته سرخوږی جوړ کړ. تازه بیا یونس قانوني هم له حنیف اتمر سره مخالف کړی دی او پر هغه د بې باورۍ په اړه یې غږیز کلیپ رسنیز شوی دی.
تاسې د حنیف اتمر پس منظر ته لاړ شئ، هغه یو فرېبکاره، دروغجن او مفسد سړی دی. اسماعیل خان په خپلو خبرو کې ویلي وو، چې یوه ورځ حنیف اتمر په کابینه کې د پرځېدلي جمهوریت رئیس جمهور ته ویل: زما مشاورین زیات دي، ځکه په پوهنې وزارت کې کارونه هم یو څه ډېر دي. د وخت رئیس جمهور ترې پوښتنه کوي، چې ستا څو مشاورین دي؟ حنیف اتمر ور غبرګوي چې درې سوه مشاورین لرم. هغه یې د معاش په اړه پوښتنه کوي، حنیف اتمر یې په ځواب کې وایي، د معاش غم یې نشته هغه انګلستان ورکوي. دا په داسې حال کې چې مونږ ډېری اداراتو کې نږدې نفرو ته امتیاز نشوای ورکولای.
اسماعیل خان د حنیف اتمر په اړه زیاتوي چې “تاسو” د داسې یو فریبکاره سړي سره څنګه کولی شئ، چې کار وکړئ!؟ که کار وهم کړئ، نتیجه به یې څه وي!؟ تورن اسماعیل خان داسې غږېدلی لکه نوموړی چې د حنیف اتمر په شتون کې له دې مجمع تېر وي، ځکه له مخاطب سره په داسې الفاظو خبرې کوي، چې ځان له مجمع وتلی حسابي.
خو بلخوا په ۲۰۰۹م کال کې د ویکي لیکس وېب پاڼې له لورې هغه سند افشاء شو، چې پکې ویل شوي وه، کرزي د امریکا د فشارونو سره – سره بیا هم په فساد ککړ اسماعیل خان د اوبو او انرژۍ وزیر ټاکلی دی. له دې یو کال وروسته د افغانستان د اداري فساد پر وړاندې د مبارزې عالي ادارې د اوبو او انرژۍ وزیر اسماعیل خان په مالي فساد تورن کړ او د دې ادارې د هغه وخت مشر، ډاکټر عزیز الله لودین، په یوې ځانګړې مرکه کې چې له طلوع ټلوېزیون سره یې کړې وه، ویلي وو چې اسماعیل خان د ځمکو په غصب او د پیسو په غلا کې لاس لري. د لودین په وینا، اسماعیل خان د دغو ځمکو سند د خپلې مېرمنې په نوم ثبت کړی دی.
نوموړي ورته څرګندونې د کابل پوهنتون استادانو سره د غونډې پر مهال هم کړې وې او په څرګند ډول یې د انرژۍ او اوبو وزیر په فساد تورن کړی و. هغه په ښکاره وویل: “ما اسماعیل خان په فساد تورن کړی دی، خو اوس وګورئ چې څوک جرئت لري چې له هغه څخه وپوښتي چې هغه غلا شوې پیسې او شتمنۍ بېرته ورکړي.”
هغه وخت لودین د غصب شویو پیسو او شتمنیو کره شمېر نه ؤ واضح کړی، خو بیا یې د ولسي جرګې په یوه غونډه کې ویلي وه، چې تاسو له هغو وزیرانو څخه یوه ته رایه ورکړې چې د اویا میلیون ډالرو په اختلاس کې ښکېل دی.
د طالبانو پر ضد د شر او فساد په راجوړه شوې مجمع کې ټول هغه مفسدین را یوځای شوي، چې وطن یواځې د خپل هوس، د نفس د پړسولو لپاره مخکې – مخکې کوي. داسې ښکاري چې جوړه شوې خیالي مجمع به له داسې یو حالت سره مخ شي، چې په کې د ښکېلو اتباعو له لورې به د یو او بل د محوه کولو هڅې وشي، لکه په تېرو خیالي جبهو کې چې وشوې؛ ځکه د دوی تر منځ اختلافات دومره ژورو شوي، چې د یو او بل شتون له ډلې د وتلو باعث ګڼي. دوی به ټول هغه خیانتونه را وسپړي چې مخکې او یا اوس په کې لتاړ وي او په دې سره به وکولی شي، خپل مخالف را پرځوي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.