۳۲ کاله وړاندې د ویجاړوونکې کورنۍ جګړې په ترڅ کې چې د وخت د جګړه مارو رهبرانو له لوري رهبري کېدې، د کابل د افشارو سیمې خلک د خپل ژوند له تر ټولو تورو ورځو سره مخ شول.
د ۱۳۷۱ لمرېز کال د لیندۍ په ۲۱ او ۲۲ مه نېټه، د د خاین او وطن پلورونکي احمدشاه مسعود په مشرۍ د شوری نظار ځواکونو د کابل پر افشار سیمه برید وکړ، دا سیمه هغه وخت د هزاره هېوادوالو د هستوګنې ځای و، دوی هلته داسې وحشتناک جنایتونه ترسره کړل چې د تاریخ راویان یې هم له بیانولو څخه شرمېږي.
په دې برید کې چې نېغ په نېغه د احمدشاه مسعود په لارښوونه او مشرۍ ترسره شو، سلګونه هزاره هېوادوال په بې رحمۍ سره ووژل شول، مال او شتمني یې ولوټل شول، پر ګڼ شمېر ښځو جنسي تېري وشول او دا بېوزله سیمه په یوه ویرونکې کنډواله بدله شوه. د امریکا د بهرنیو چارو وزارت د ۱۹۹۳م کال د بشري حقونو راپور وايي چې په دې جنایت کې شاوخوا زر کسان وژل شوي وو.
کله چې د غرب لاسپوڅی جمهوریت واک ته ورسېد او د مسعود پیروانو او هغو کسانو چې په دې جنایاتو کې یې برخه درلوده، قدرت تر لاسه کړ، ډېرې هڅې وشوې چې دا تاریخي جنایت پټ وساتل شي، سره له دې چې د قربانیانو له لوري د عدالت غوښتنې پرله پسې غوښتنې وشوې، خو عاملین او بنسټګر یې هیڅکله محاکمې ته راکش نه شول.
د مسعود د مکتب شرارت غوښتونکو پیروانو ډېره هڅه وکړه چې د خپل رهبر له تندي څخه دغه تور دا پاک کړي او د هغه په وینو سره لاسونه د بې ګناه انسانانو له وینو پاک کړي؛ خو دا نه بښونکی جنایت دومره ستر او ژور دی چې د کلونو په تېرېدو سره هم ځپل شویو او قرباني شويو هزاره وګړو د خپلو دوستانو د لاسه ورکولو غم نه دی هېر کړی او نه یې هم د دې جنایت عاملینو ته بښنه کړې. دا وحشتناک جنایت د یوه تور داغ په توګه د مسعود او د هغه د پیروانو پر تندي حک شوی او د هغوی توره څېره یې نړۍ ته رسوا کړې ده.
د جمهوریت له پرځېدو او له واک څخه د پخوانیو جګړه مارانو او د مسعود ډلې له لرې کېدو وروسته، په تېرو څو ورځو کې د افغانستان هزاره وګړو په مجازي نړۍ کې ستر کمپاین پیل کړی او د افشار د جنایت عاملینو ته د سزا غوښتونکي دي.
اوس د مقاومت جبهې پلویان او د سرپرست حکومت نور مخالفین چې هر یوه یې په کورنیو جګړو او د افشار په جنایت کې په یوه نه یوه ډول لاس درلود، له عدالت څخه د تېښتې او د خپل دې جنایت د پټولو لپاره، یاد کمپاین او هغه کسان چې د عدالت د ټینګښت لپاره هڅه کوي، په دې تورنوي چې د تاجک او هزاره قومونو ترمنځ نفاق رامنځ ته کوي او هغوی د پردیو لاسپوڅي بولي.
په داسې حال کې چې د دې جنایت عاملین د افغانستان د قومونو ترمنځ د اختلاف او پاشلتیا اصلي لاملونه دي، هغوی هر ځل د خپلو شخصي ګټو د خوندیتوب لپاره د بېلابیلو قومونو له نومونو څخه ناوړه ګټه اخیستې او ډېر وختونه یې قومي او سمتي اختلافاتو ته لمن وهلې ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.