یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د شر او فساد ډلې تل هڅه کړې چې د افغان ملت ترمنځ د نفاق او پاشلتیا د زهرو په شیندلو او د یهودو او نصاراوو د غلامۍ په وسیله، په دې سپېڅلې خاوره کې خپلې شخصي ګټې ترلاسه کړي.
دغه ډله کله د امریکا په لمن کې د روسیې په وړاندې، کله د روسیې په لمن کې د امریکا په وړاندې او کله یې د ایران په لمن کې د عربستان په خلاف دریځ نیولی، کله د پاکستان د انګلیسي پوځ تر څنګ چې د افغانستان تلپاتې دښمن دی؛ درېدلې ده. دوی افغانستان د خپلو دې اُجرتي او غلامو چوپړونو ډګر ګڼي، هېڅکله یې د دې خاورې اسلامي اصول او ملي ګټې په پام کې نه دي نیولي، بلکې تل یې د خپلو بدنامو ګټو لپاره د پردیو لاس نیولی دی.
د شر او فساد ډله باید پوه شي چې دا خاوره د سلطان محمود غزنوي په څېر واکمنو میراث دی، چې نن یې بچیان په خپلو سرو وینو کې په لامبو وهلو سره د دې اسلامي خاورې له هر کونج او کنار څخه دفاع کوي.
د افغانانو همدا یووالی د دې لامل شو چې درې زبرځواکونه او امپراطورۍ په یوه پېړۍ کې په دې پاکه خاوره کې د شرمناکې ماتې خوند وڅکي او وتښتي. د اشغالګرو پر وړاندې د افغانانو زړور او سوځوونکي مقاومت دا تضمین کړې چې نن سبا هیڅ پردي پال ځواک، په ځانګړې توګه د شر او فساد ډله، د دې غیور ملت پر وړاندې د درېدو جرئت او توان نه لري.
افغانان د هماغه سپېڅلي یووالي او همغږۍ په مټو چې امریکا او شوروي یې دړې وړې کړل، نن هم د شر او فساد ډلې پر وړاندې په کلکه اراده او فولادي عزم سره درېږي.
که د شر او فساد ډله هڅه کوي د پاکستان د غلام او انګلیسي پوځ سره د افغانستان د مسلمان ملت پر وړاندې لاس یو کړي؛ نو افغانان هم خپل مشروع حق لري چې په یو موټي ارادې او فولادي عزم سره د دې اجیرې ډلې ریښې له خپلې سپېڅلې خاورې څخه وباسي.
د بغاوت جبهه باید پوه شي چې د پردیو په غلامۍ سره هېڅکله خپلو ناروا موخو ته نشي رسېدلی؛ ځکه افغانان تل د غلامانو او پردیو پر وړاندې په مېړانه درېدلي دي.
هره هغه ډله چې د افغان حکومت د کمزوري کولو او د پردیو هېوادونو د چوپړ نیت ولري، باید پوه شي چې افغان ملت به له خپل ټول توان سره له خپل اسلامي عزت او خاورې څخه دفاع وکړي او د هغوی د خیانت ریښې به وچې کړي.
افغانان باید ویښ وي او هېڅکله اجازه ورنه کړي چې د دې خاورې هغه دښمنان، چې په فرانسه او تاجکستان کې ناست دي او د یهودو او نصاراوو په فرمایش چلیږي، یو ځل بیا دا سپېڅلې خاوره ناامنه کړي. موږ ټول باید له خپل نظام او مسئولینو ته د همکارۍ لاسونه ورکړو او په ګډه د دښمنانو دسیسې په نطفه کې خنثی کړو.