عطا محمد نور، چې مخکې یې له افغانستان انټرنشنال ټلویزیون سره نږدې اړیکې درلودې، وخت ناوخت به یاد ټلویزیون ته ور مېلمه کېده او انټرنشنال ټلویزیون به یې د اوسني وخت د بهترینو رسنیو بدیل باله، اوس یې بیا پر دغه رسنۍ نقد کړی، چې له امله یې د ټولنیزو رسنیو د فعالانو ترمنځ پوښتنې را ولاړې کړې دي.
که موضوع تنها اصولي نقد وي، نو نوموړي به ډېر وړاندې نقد کړی وای او په سيستماتيک ډول به د یادې رسنۍ منتقد پاتې شوی و، خو ناڅاپي بدلون یې د دې ښکارندويي کوي، چې کومه نوې معامله شتون لري.
عطا محمد نور یو انعطاف پذیره سیاستوال دی، له فرصتونو سره ځان عیاروي، نوموړی په دې پوهېږي چې افغانستان انټرنشنال د هغه سیاسي ګټو ته ضرر رسولی او د ده د سیاسي سیالانو او رقیبانو ملاتړ ته یې مخه کړې ده؛ عطا محمد نور احساس کړې، چې انټرنشنال د ده سیاسي رقیبانو ته وزن ورکوي، نور د ده اهدافو ته اهمیت نه ورکوي او نه د هغه اړخ تمثیل کوي، کوم چې عطا محمد نور یې تمه لري، مخکې دا رسنۍ د ده له موقف سره همغږې وه، مګر اوس په ياده رسنۍ کې د ده د سیالانو نفوذ عروج کړی دی او عطا محمد نور ځان د جمعیت ګوند دننه منزوي احساسوي.
موده وړاندې افغانستان انټرنشنال ادعا وکړه، چې بهر مېشتو سیاسیونو په ترکیه کې د پاکستان له استازو سره نه دي لیدلي، ظاهراً دا خبره د ټول جمعیت ګوند په تاوان مالومېږي، مګر د مقاومت جبهې رهبري یا په ټیټه کچه افرادو یاد خبر رد نه کړ، خو علت یې څرګند دی، هغه دا چې رباني له ایران، روسیې او حتی له ځینو لویدیځو کړیو سره په ارتباط کې دی، خو عطا محمد نور بیا هڅه کوي، د ترکیې، پاکستان او نورو سیمه ییزو لوبغاړو او کړیو ملاتړ ولري، خو ورځ تر بلې د خپلو سیالانو له خوا کړۍ پرې راتنګېږي، دغه لیدنه له پاکستان سره بې معنی وګڼل شوه او حتی له شتون څخه یې انکار وشو، دې کار عطا محمد نور مجبور کړ چې خپل غږ پورته کړي.
عطا محمد نور د افغانستان په سیاست کې هغه جنجالي څېره ده، چې د خپل ګوند دننه له یو لړ رقابتونو او سیالیو سره لاس او ګرېوان دی. د مجبوریت او مايوسۍ وروستی لنډ او واضح ټویټ دا په ډاګه کوي، چې د ده رقیبان تر ده یو قدم مخکې دي او انټرنشنال ټلویزیون هم تر بېلابېلو فشارونو لاندې حرکت کوي، هلته د ده تر نظریاتو او غوښتنو د نورو نظریاتو ته زیات اهمیت ورکول کېږي.
د جمعیت دننه د ده سیاسي رقیبان لکه د برهانالدین رباني زوی صلاحالدین رباني، چې د جمعیت د مشرۍ دعوه يې هم درلوده، که نړۍوال او کورنی ملاتړ پراخ کړي، نو عطا محمد نور به د جمعیت دننه منزوي شي. رباني د احمد مسعود، بسمالله محمدي او ځینو نورو سیاسیونو ملاتړ لري، خو عطا محمد نور د دې باوجود هم امید لري د شمال اصلي لوبغاړی واوسي، مګر په اوسنیو حالاتو کې په تدریج سره له هستې څخه د څنډو خواته ایستل کېږي. د دغه انزوا لومړی ټکان چې عطا محمد نور ته ورکړل شو، په انټرنشنال ټلویزیون کې د اهمیت له لاسه ورکول و.
بل سیال یې احمد مسعود، که څه هم د مقاومت جبهې مشري کوي، خو د جمعیت ځینې پخواني غړي د ده ملاتړ کوي، نه د عطا محمد نور؛ نو نوموړی مجبور دی چې په نویو لارو غور وکړي، ټویټ یې لومړنی اقدام و، چې له دې وروسته به نور اقدامات هم وکړي، يا به له دوی څخه لار بېله کړي، یا به نوی حرکت او تنظیم پیل کړي او یا به د طالبانو خوا ته میلان وکړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.