د افغانستان بانک لوی رئیس نور احمد اغا کابل کې د چین له سفیر ژاوشینګ سره په کتنه کې د دواړو هېوادونو ترمنځ د مالي او بانکي همکاریو پر پراختیا خبرې کړې دي.
افغانستان بانک د یوې خبرپاڼې په خپرولو سره ویلي، چې ښاغلي نور احمد اغا په دې کتنه کې چین د افغانستان مهم ګاونډی بللی او ویلي یې دي، چې د افغانستان بانک په تېرو نږدې څلورو کلونو کې له ګڼو نړیوالو مالي او بانکي بنسټونو سره اغیزمنې اړیکې رامنځته کړي او ژمن دی، چې دا اړیکې لا پسې پیاوړې او پراخه کړي.
نوموړي زیاته کړې، هڅه کوي چې د مالي او بانکي سکټور په برخه کې تخنیکي همکارۍ زیاتې کړي، د پانګونې لپاره لا ډېر مناسب او خوندي چاپيریال برابر کړي، سوداګري اسانه کړي او ظرفیت لوړونې او په نورو اړوند برخو کې عملي اقدامات تر سره کړي.
له بل لوري په دې لیدنه کې د چین سفیر جاوشینګ له خپله اړخه د لا زیاتو همکاریو ډاډ ورکړی او ټینګار یې کړی چې هېواد یې غواړي د افغانستان په اقتصادي رغونه کې خپل مثبت رول ولوبوي.