نړیوال بانک په خپل تازه راپور کې چې د افغانستان د پراختیا تازه معلومات یې عنوان کړی، اعلان کړی چې د افغانستان اقتصاد د دویم پرله پسې کال لپاره د ودې په حال کې دی. د نړیوال بانک په وینا، تمه ده چې د افغانستان ناخالص کورنی تولید په ۲۰۲۵ کال کې ۳.۴ سلنه وده وکړي، چې دا د ۲۰۲۴ کال د ۲.۵ سلنې ودې په پرتله زیاتوالی ښيي.
د سرچینې په خبره، د دې اقتصادي ودې اصلي لامل هغه تقاضا ده، چې له ایران او پاکستانه راستانه شویو دوو میلیونو زیاتو کډوالو رامنځته کړې، چې له امله یې د خدمتونو او صنعت برخې فعالې شوې دي. همدارنګه د کرنې په برخه کې د غنمو بې ساری حاصل ترلاسه شوی او د کانونو او ودانیزو چارو برخو هم د اقتصاد په وده کې مرسته کړې ده.
د افغانستان اقتصادي ودې بیا یو شمېر مخالفین اندېښمن او وارخطا کړي او هڅه کوي، چې دا لاسته راوړنه کوچنۍ او له سترګو لوېدلې وښيي، دوی د تل په څېر د کاذبو او له حقیقت لیرې معلوماتو د خپرولو له لارې غواړي، چې د افغانستان دغسې لویو لاسته راوړنو او پرمختګونو ته منفي رنګ ورکړي، د خلکو ذهنونه بلې خواته واړوي او داسې وښيي چې ګواکې دا پرمختګ مهم او ارزښتمن نه دی. دوی د دغه ډول ناسمو او له حقیقت لیرې شایعاتو په خپرولو سره په دې لټه کې دي، چې ځان ته کاذب تلقین ورکړي او د خلکو او نړۍ پام بلې خوا ته واړوي.
خو د افغانستان اقتصادي وده او په ګڼو نورو برخو کې پرمختګونه داسې څه نه دي، چې د یو څو کسانو او مشخصو ادرسونو په منفي نظریو او تبلیغاتو دې د چا پام ترې واوړي. د افغانستان د ننه خلک او ولسونه هر څه په خپلو سترګو ویني. د لومړي ځل لپاره په افغانستان کې سترې عمراني پروژې له بهرني ملاتړ پرته د هېواد له داخلي عوایدو او بودیجې تأمینېږي، د کابل – کندهار په څېر د سړکونو او لویو لارو پروژې، د سالنګ د تونل جوړول او پراخول، د قوش تيپې کانال په څېر د سترو پروژو پیل، د رېل پټلۍ غځول، ټاپي، کاسا زر، د برېښنا او انرژۍ په برخه کې سترې پروژې پیلول او بشپړول او په همدې ډول سلګونه او زرګونه نور موارد هغه څه دي چې نه په کور د ننه او نه هم بهر ترې سترګې پټېدای شي.
دغه راز افغانستان په اوسني وضعیت کې له بهرنیو هېوادونو څخه خپل هېواد ته د خپلو اتباعو د راستنېدو له تر ټولو لویې او بې سارې جوپې سره مخ دی، نږدې درې میلیونه کسان یې بېرته خپل هېواد ته را ستانه شوي او دا لړۍ لا هم روانه ده، خو له دومره بحران سره سره، هر څه مدیریت او مهار شوي ښکاري او په دې اړه ترسره شوي ټول منفي اټکلونه ناسم وختل. په ډېرو نورو برخو لکه سیاسي، ډيپلوماتیکو، ټولنیزو، فرهنګي او آن نظامي کې هم لویې لاسته راوړنې او بریاوې د هېچا له پامه نه شي غورځېدای او دا ټول پرمختګونه او لاسته راوړنې د یوې روښانه راتلونکې زېري دي.
پر افغانستان او پرمختګ مین خلک دغو ټولو بریاوو او لاسته راوړنو ته خوشحاله دي او د لا ډېرېدو هیلې یې لري، مګر په بهر کې مېشتې مخالفې ډلې ټپلې، کړۍ او اشخاص زړه ورته خوري، نو ځکه منفي تبلیغاتو ته مخه کوي او د پیکه کېدو هڅه یې کوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.