د افغانستان سرپرست حکومت، د ثور ۷مې کودتا او ورپسې پر هېواد کمونیستي تاړاک غندلی او د ثور ۸مه یې په هېواد کې د ازادۍ تاریخي ورځ بللې ده.
د سرپرست حکومت مرکزي ویاند مولوي ذبیح الله مجاهد په یوه خبرپاڼه کې ویلي چې، له نن ۴۷ کاله وړاندې د کمونیزم د لښکرو له خوا د وخت پر حکومت پوځي کودتا وشوه او د یوه مسلمان مېړني ولس پر حریم د تېري لپاره زمینه برابره شوه؛ خو د مسلمان او مجاهد ملت په زړورتیا سره له ۱۴ کاله مبارزې وروسته دا تور فصل پای ته ورسېد او افغانانو د ۱۳۷۱ل کال د ثور په ۸مه ازادي او استقلال بېرته ترلاسه کړ.
خبرپاڼه کې وړاندې راغلي چې، سرپرست حکومت د خپل وطن د خپلواکۍ د اعادې او یووالي د راوستلو، د هرج و مرج له منځه وړلو او شرعي نظام د نفاذ لپاره تأسیس شوی و، هغه هدف ته رسیدلی او اوس یې وخت دی چې خلک د یو با ثباته او په اسلامي نظام د یوه ښایسته شوي افغانستان د دوام او پایښت لپاره یو موټی شي.