د هرات ولايت مقام د يوې خبرپاڼې په خپرولو سره وايي چې د ټاپي پروژې عمومي رييس «مراد امانوف» د هرات له والي مولانا اسلام جار او د بهرنيو چارو وزارت له استازي سره په ليدنه کې د ټاپي پروژې د کارونو له چټکتيا ډاډ ورکړی او ويلي یې دي چې د افغانستان په خاوره کې د ټاپي پروژې پايپ لاين درې کيلومټره غځول شوی دی.
خبرپاڼه زياتوي چې ښاغلي اسلام جار د سيمه اييزې ادارې له لوري د ټاپي پروژې رييس ته د کارونو د چټکتيا په موخه د اړينو اسانتياوو د برابرولو ډاډ ورکړی دی.
له ترکمنستان څخه هندوستان ته د ټاپي په نوم د ګازو د دې نلليکې ټول اوږدوالی ۱۸۱۴ کيلومټره دی چې ۸۱۶ کيلومټره یې د افغانستان په خاوره کې له هرات، فراه، او کندهار ولايتونو څخه تېرېږي.