د ۱۴۰۳ل کال د قوس مياشتې په ۱۶مه نېټه د طالبانو خلاف له څو ګوندونو، احزابو او بې اغیزې ډلو – ټپلو د افغانستان ژغورنې مجمع د يوې انلاین ناستې له لارې د خپل شتون اعلان وکړ. په دې مجمع کې د شر او فساد ډلو فکري مخالفي، نوې او نرمې څهرې سره راټولې وې، د دوی له اولې را ټولیدنې او د مجمع له اعلان سره همدا تحليلونه وو، چې دوی به څومره وکولای شي، چې د طالبانو په وړاندې يو ګډ دريځ او ثابت قدمه تګلاره روښانه او رامنځته کړي.
خو د تېرو دريو کلنو په څېر دا اعلان شوې مجمع د يوې اوونۍ تر پوره کېدلو وړاندې، د يادې مجمع مهم غړي جنګسالار تورن اسماعیل خان د مجمع پر بل غړي حنيف اتمر او د پرځېدلي جمهوریت پر پخواني مشر حامد کرزي د فساد او د بې باورۍ تورونه پورې کړل او د نوموړي شتون یې په نوې مجمع کې وننګاوه.
تورن اسماعیل خان، حنیف اتمر يو فريب کار او د شخصي ګټو پالونکی کس بللی؛ هغه زیاته کړې چې تل د خپلو ګټو لپاره کار کوي او په تېر کې یې قوم او ملت هم د خپلو شخصي ګټو استعمال کړي دي.
د طالبانو خلاف په تېرو دريو کلنو کې تر يو او بل نامه لاندې جبهې او ائتلافونه جوړېږي، خو په دې تازه مجمع کې دومره ژر په ستره کچه اختلاف را څرګند شو؛ د تورن اسماعیل خان لخوا د حنیف اتمر داسې تورن کول او د شتون په اړه يې مخالفت ښکاره کول، ددې مجمع راتلونکی ټکنی او انشعاب ته په ټوله معنا لاره هواره کړه.
د افغانستان ژغورنې مجمع لخوا په دې خوځښت کې حنیف اتمر، عمر داودزي، تادين خان، رحمت الله نبیل او نورو پښتنو ته ددې لپاره ځای ورکړل شوی وو، چې دا ځل د دوی په شمول د طالبانو خلاف يو ګډ او همه شموله خوځښت رامنځته کړي، خو د اسماعيل خان لخوا د اتمر له شتون سره مخالفت هغه ادعاوې حقيقت ته رسوي چې تېر ټول د مقاومت تر عنوان لاندې، د شر او فساد ډلو رهبري د یوې فاشستي ډلې په لاس کې ده.
د يو او بل پر وړاندې د تورونو لړۍ په دې نوې مجمع کې اسماعیل خان پيل کړه، وروسته به د ده په ځواب کې حنیف اتمر حتمي د خپل ځان دفاع او اسماعیل خان د تيرې اوږدې تیاره ماضي څخه پرده پورته کوي، ځکه د طالبانو خلاف دا را ټول شوي عناصر يو هم ښه ماضي نه لري، بلکې له کورنيو جګړو را نيولې بيا د قدرت له جزايرو او فساد اړوند په سترو در بدريو کې ښکېل دي؛ د دوی ټولو تېر تاریخ د افغان ولس په حافظه کې ترسیم دی.
لکه څنګه چې ټول د طالب ضد جريانونه په تېرو دريو کلنو کې د خپلو شخصي ګټو د تحقق په تکل په دې ونه توانېدل، چې يو ثابت دريځ او د مخالفت مشخص ميکانيزم او روش رامنځته کړي، دا مجمع هم د شړېدلو او تېرو ډلو پر پل پله ایښودونکې ده، چې دوام او عمر به یې خورا لنډ وي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.