هندوکش غږ ته د رسېدلو معلوماتو پر بنسټ، “د افغانستان د لویدیځي حوزې همغږۍ شوری” تر عنوان لاندې یوې ډلې، “د افغانستان ژغورنې لپاره ملي مجمع” په وړاندې یوه اعلامیه خپره کړې ده، د لویدیځي حوزې همغږۍ شوری ویلي، چې دوی د پنځو ولایتونو(غور، بادغیس، هرات، فراه او نیمروز) یو سیاسي خوځښت دی او په یادو ولایتونو کې د پراخو ریښو لرلو ادعا لري.
د افغانستان ژغورنې مجمع له جوړېدو سره هم مهاله د دغه ډلې په منځ کې د ژورو اختلافاتو له را څرګندېدو وروسته، د لویدیځي حوزې شوری چې له دغه ډلې څخه جلا ده، مخالفت څرګند کړی او دوی یې د افغانستان د څلور لسیزو ناخوالو عاملین ګڼلي دي.
د لویدیځي حوزې شوری ویلي، د افغانستان ژغورنې مجمع غړي له څلور لسیزو زیات بحرانونو او د قدرت پر سر د داخلي جګړو عاملین دي، همدا راز لیري ده چې دوی دې د هېواد د بحران لپاره حل لاره پیدا کړي.
د افغانستان ژغورنې مجمع مشران پر افغان مؤمن او مجاهد ولس د لسیزو ناکامو تجربو اصلي عاملین دي او ولس ښې خاطرې نه ترې لري.
له همدې امله د لویدیځي حوزې شوری ټینګار کړی، چې له اوسنیو بحرانونو څخه وتل یواځې د نوې مفکورې او د هېوادنیو ګټو لپاره د رښتینې ژمنتیا له لارې ممکن دي، نه د هغو ناکامو تجربو په تکرار سره چې د دې ائتلاف ځینې مشران یې واقعي سمبولونه دي.
د لویدیځي حوزې شوری څرګنده کړې، چې د ژغورنې مجمع منشور ښیي، چې د افغانستان په سیاسي نظام کې بنیادي تغیر نشي راوستلای، همدا راز نشي کولای د ولسونو بنسټیز حقونه او فردي ازآدۍ تأمین کړي، بلکې د دغه ائتلاف اصلي نیت دا دی چې له طالبانو سره د واک په وېش کې د ګډون لپاره زمینه مساعده کړي.
د لویدیځي حوزې شوری د ژغورنې مجمع د منشور په اړه زیاته کړې، چې د ستونزو د حل پر ځای دغه منشور شخصیت محوره شوی او د دې تر څنګ چې د استازولۍ مشروعیت نلري، ځان د افغان ولس واقعي استازي او افغانستان د مسئلې اصلي طرف څرګندوي.
د لویدیځي حوزې شوری همدا راز د ژغورنې مجمع ته په اشارې سره ویلي، د دغه سمت په نوم یا استازولۍ هیڅ فرد او ډلې ته اجازه نه ورکوي، چې د دوی تحمیلي استازولي وکړي.
په بهر کې مېشت د شر او فساد مشران له درې کلونو هڅو برسېره نه دي توانېدلي چې نړۍواله ټولنه د جګړې، د یو بل فصل په پیل قانع کړي، له همدې امله فعالان او نوري ډلې د افغانستان ژغورنې مجمع په دې تورنوي چې په نویو نومونو ډلې را یو ځای کوي، تر څو طالبانو سره په واک کې شریک شي.
هغه ډلې چې له ژغورنې مجمع سره نه دي یو ځای شوي، ډېری وخت پر دې ټینګار کوي چې یاده مجمع له جعلي او تکراري شخصیتونو څخه جوړه شوې او یواځې غواړي له دې لارې شخصي ګټو ته کار وکړي.
په اعلامیه کې پورته ټکو په خورا صراحت څرګنده کړه، چې د لویدیځي حوزې د استازیتوب په بهانه، په ژغورنې مجمع کې هیڅ ډله/ ګوند ګډون نشي لرلای. په دې سره د افغانستان ژغورنې مجمع د استازولۍ داعیه او منشور تر سوال لاندې راغلل او د دغه مجمع پر تابوت یې یو بل مېخ هم ټک واهه.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.