د ارشاد، حج او اوقافو وزارت د روان کال د حج لپاره د افغان حاجیانو سهمیه او لگښتونه اعلان کړل.
د ارشاد، حج او اقافو وزیر نور محمد ثاقب د یو خبري غونډې له لارې د حاجیانو سږنۍ سهمیه ۳۰۰۰۰(دېرش زره) اعلان کړه او د حج فریضې د اداء کولو لپاره یې د هر حاجي ټول لگښت ۳۸۶۵.۹۸ امریکايي ډالر چې معادل یې (۲۷۷۰۰۶،۷۴) افغانۍ کېږي اعلان کړل.نوموړي وویل، د سعودي عربستان څخه د افغانستان لپاره دېرش (۳۰) زره د حج سهمیه اخیستل شوې او د لازیاتې سهمیې غوښتنه هم شوې ده.
همدارنگه راکړل شوې سهمیه په شفاف او عادلانه توگه په ټول هېواد کې د حج په متقاضیانو باندې وېشل کېږي.:«په روان ۱۴۴۵ هـ ق کال کې د حج په پروسه کې د نورو نوښتونو ترڅنگ د یو شمېر نوې نوملیکنه په بریالیتوب سره په ټول هېواد کې شوې، چې د سږکال د حج سهمیه د عامو حاجیانو ترڅنگ، مجاهدینو، دولتی (امارتي) اداراتو، د شهیدانو د ورثوو، په ایران او پاکستان او نور هېوادونو کې د مهاجرینو لپاره هم سهمیې په جلا جلا توگه مشخص شوي دي.»
ده وویل، د هر ولایت د حجاج کرامو د لارښوونې او هغوی ته د حج د مناسکو د تعلیم او زده کړې ورکولو په موخه د پرو سږکال په ازموینه کې چې زرگونو علماء کرامو پکې گډون کړی وو، په لوړو نمرو د بریالیو علماء کرامو څخه د با صلاحیته کمېټې له لوري حجاجو د معلمینو په حیث په شرایطو او معیارونو د برابرو علماء کرامو غوره کول.:«د حاجیانو د ښه خدمت په موخه د انتخاب شوو معلمینو لپاره د هېواد د شیوخو اوجیدو علماء کرامو، مسلکي او تجربه لرونکو استادانو له لوري د حج پروسې په ټولو برخو کې هغوی ته د سمینارونو جوړول، سعودي عربستان ته د حاجیانو د لېږد او رالېږد په موخه د آریانا افغان او کام ایر خصوصی هوایي شرکتونو سره تړونونه کول، د افغانستان د حاجیانو لپاره د حنفي مذهب مطابق د حج لارښود کتاب چې آسان، مختصر، مدلل، محقق او هر اړخیز دی او د حج اړوند مهم اصطلاحات او د مبارکو ځایونو پېژندنه پکې شوې ده په پښتو او دري ژبو بیا چاپول.»
ده زیاته کړه، سږ کال هڅه کوي په مکه مکرمه کې د ټولو حاجیانو لپاره حرم شریف ته نږدې په یوه مهمه او مرکزي سیمه کې تعمیرونه ونیسي او همدارنگه په مدینه منوره کې په مرکزي او ورسره نږدې سیمو کې د ودانیو قراردادونو سربیره د تېر کال په څېر په مدینه منوره کې حاجیانو د غوښتنې او ضرورت له مخې د درې وخته ډوډۍ انتظام برابرول.
د ارشاد، حج او اقافو وزارت داسې مهال د سږني حج لپاره د چمتووالي خبره کوي، چې هر کال افغان حاجیان شکایت کوي چې د نورو هېوادنو په پرتله د افغان حاجیانو اسانتیاوې کمې وي، خو پیسې تر نورو ډېرې اخیستل کېږي.