د افغان حکومت وياند مولوي ذبيح الله مجاهد وايي، د حکومت مشرتابه په يوه حکم کې يو لړ تازه ټاکنې ترسره کړي، چې له مخې یې د لغمان ولایت مخکنی والي شیخ شیر احمد حقاني د اطلاعات او فرهنګ وزارت د وزیر په توګه او د اطلاعات او فرهنګ وزارت مخکنی وزیر ملا خیرﷲ خیرخواه د میدان وردګ ولایت د والي په توګه وټاکل شول.
په ټاکنو کې دغه راز د میدان وردګ ولایت مخکنی والي قاري محمد بختیار معاذ د لغمان ولایت د والي په توګه او د ۳۱۳ مرکزي قول اردو مخکنی مرستیال ملا محمد حافظ مجاهد؛ د فراه ولایت د والي په توګه ټاکل شوي.
دغه راز د فراه ولایت مخکنی والي مولوي غوث الدین رهبر د ۳۱۳ مرکزي قول اردو د مرستیال په توګه، د ۲۰۵ البدر قول اردو اړوند دوهمې پلي لواء مخکنی قومندان قاري محمد نسیم عزت؛ د جوزجان ولایت د مرستیال په توګه، د کابل ښار دریمې امنیتي حوزې مخکنی آمر حاجي شیرعلي جند ﷲ د پکتیا ولایت د امنیه قومندان په توګه او د ۲۰۹ الفتح قول اردو لومړۍ پلي لواء مخکنی قومندان ملا عبدالشکور بریالی د ۲۰۵ البدر قول اردو د دوهمې پلي لواء د قومندان په توګه ټاکل شوي.
پر دې سربېره د جوزجان ولایت مخکنی مرستیال مولوي نورالدین؛ د ۲۰۹ الفتح قول اردو لومړۍ پلي لواء د قومندان په توګه او د پکتیا ولایت مخکنی امنیه قومندان مولوي محمد عمر مخلص د کابل ښار دریمې حوزې د آمر په توګه ټاکل شوي.