د احمدشاه مسعود د وژل کېدو د ۲۴ کال په مناسبت د افغان حکومت د مخالفو تش په نوم جبهو او ډلو ټپلو ځينو مشرانو په يوه انلاين ناسته کې، له خپلمنځي اختلافاتو سر ټکولی او د دوی په خبره همدا اختلافات پر دوی د «طالبانو» د بريا لامل شوي دي.
د مقاومت په نوم د خيالي جبهې مشر احمد مسعود يادې غونډې ته ويلي:«طالبان ځکه زموږ پر وړاندې بريالي دي، چې موږ يو د بل پر ضد درېږو.»
له دې ورهاخوا محمد محقق هم د مخالفو جبهو ترمنځ يووالی او د اختلافاتو له منځه وړل جدي اړتيا ګڼلې او ټينګار یې کړی، چې يو بل باید ومني او اختلافات پای ته ورسوي.
د مخالو ډلو ټپلو ترمنځ د اختلافاتو په له منځه وړلو داسې مهال ټينګار کېږي، چې د دوی ډېری مشران له شديدو خپلمنځي اختلافاتو ورهاخوا په مخامخ او انلاين ناستو کې تر لفظي او فزيکي شخړو رسېدلي دي.
په عام باور د دوی ترمنځ د اختلافاتو په له منځه وړلو ټينګار يواځې، د انلاين ناستې تر غوولونکو شعارونو محدود دی او په حقيقت کې يو د بل وينو څښلو ته ناست دي.