د افغان دولت د مخالفت سربېره؛ په دوحه کې نن د افغانستان اړوند غونډه پیلېږي

د افغان حکومت د ښکاره مخالفت سربېره بیا هم د قطر په پلازمېنه دوحه کې نن د افغانستان اړوند غونډه پیلېږي. نړیوالې رسنۍ وايي، د ملگرو ملتونو سر منشي انتونیو گوتېرېش، د افغانستان لپاره د پاکستان ځانگړی استازی، د امریکا، ناروې، جرمني او روسیې په گډون د نړۍ د شلو هېوادونو استازي دغې ناستې ته بلل شوي دي.پرون د افغانستان د بهرنیو چارو وزارت د دوحې ناستې په اړه یوه اعلامیه خپره کړه او په دغه ناسته کې یې له گډون کولو نټه وکړه. د بهرنیو چارو وزارت له لوري په خپره شوې خبرپاڼه کې ویل شوي، د افغانستان د اسلامي امارت په تېرو دوه نیمو کلونو کې له یوې خوا په کوردننه د نظام د سیاسي، اداري، امنیتي، اقتصادي او ټولنیزو بنسټونو د ټینگښت لپاره هڅې کړې؛ خو له بلې خوا یې د سیمې هېوادونو سره په اړیکو کې ښه پرمختگ هم کړی دی.د خبرپاڼې له مخې، افغان حکومت د ملگرو ملتونو، لوېدیځو هېوادونو او په ځانگړې توگه د امریکا متحده ایالاتونو سره په هم په منظم ډول د گڼو لارو د یو اړخیزو نامشروع بندیزونو، تور او جایزې لېستونو او د افغانستان بانک د زېرمو د ازادولو په برخه بحثونه کړي دي.:« د افغانستان اسلامي امارت په دې باور و چې د قطر په پلازمېنه دوحه کې د م.م. د سر منشي انتونیو گوتېرېش په مشرۍ د افغانستان لپاره د گڼو هېوادونو د ځانگړو استازو ناسته یو بل ښه فرصت و، چې پر اختلافي ټکو پکې ښکاره او په نتیجه ولاړې خبرې شوی وی. د بهرنیو چارو وزارت ملگرو ملتونو ته واضحه کړې ده، چې که اسلامي امارت د یوازېني مسوول لوري په توگه د افغانستان په استازیتوب گډون کوي او د دوحې ناسته کې د افغان پلاوي او ملگرو ملتونو ترمنځ په لوړه کچه پر ټولو مسئایلو د واضحو خبره زمینه برابرېږي، نو گډون به ګټور وي؛ خو که په دې برخه کې د نه پرمختگ له امله د امارت له‌خوا بې‌نتیجې گډون گټور ونه‌بلل شو.»د خبرپاڼې له مخې، ملگري ملتونه باید دا حقایق درک کړي او د څو محدود لورو تر اغېز لاندې رانه‌شي، چې د افغانستان اوسنی نظام د تېر شل کلن رژیم په څېر د چا تر اغېزې لاندې نه راځي، نو د دې امکان شته چې له امارت سره په خبرو کې پرمختگ وشي.:«د سیمې له هېوادونو سره د ا.ا. تېر دوه نیم کلن تعامل وښودله چې که د تېرو شل کلنو ناکامو تجربو له تکرار څخه ډډه وشي، د یو اړخیزو تحمیلي پرېکړو، تورونو او فشارونو پر ځای یو واقعبینانه او عملګرایانه چلن خپل شي، نورو لورو سره هم دوو اړخیزو اړیکو کې پرمختګ کېدلای نه‌شي.»د دوحې ناسته داسې مهال کېږي، چې په دغه ناسته کې د افغان حکومت هېڅ استازی برخه نه اخلي، خو په نننۍ غونډه کې د افغانستان په اړوند چارو خبرې کېږي.د ۲۰۲۳ز کال د مې په لومړیو کې هم د دوحې لومړۍ ناسته شوې وه، چې په هغه غونډه کې هم د افغان حکومت استازو برخه نه لرله.د چارو شنونکي هم وايي، نړیواله ټولنه باید خپل وړاندیزونه او نیوکې د افغانستان له اوسنیو مسوولینو سره مخامخ شریک کړې او دغه ډول ناستې چې د حکومت استازي پکې نه وي د وخت ضایع بولي.