د رياست الوزراء اقتصادي مرستيال ملا عبدالغني برادر په مشرۍ د يو شمېر وزارتونو له سرپرست وزيرانو او د سکټوري ادارو له استازو جوړ پلاوی ازبکستان ته له دوه ورځني مهم سفر او لاسته راوړنو وروسته بیرته هېواد ته راستون شو.
د اقتصادي معاونيت د خبرپاڼې په بنسټ افغان پلاوي د ازبکستان د لومړي وزير په ګډون له لوړ پوړو چارواکو او د بېلابېلو وزارتونو له وزيرانو سره ګډې ناستې او بحثونه کړي او ازبکستاني لوري چمتووالی ښودلی چې ډېر ژر به افغانستان کې د کرنې، برښنا، ټرانسپورټ، او اوسپنې پټلۍ په برخه کې يو لړ پروژې پیل کړي.
د سرچينې په وينا له ازبکستاني لوري سره له بحث وروسته د ۵۰۰ کيلوولټ برېښنا مزي غځولو پروژه چې پخوا یې لګښت ۲۵۲ ميليونه ډالره شوی و ۲۲ ميليونه ډالرو ته راټيټ شوی ده.
پر دې سربېره به ازبکستان په خپل لګښت ډېر ژر له حيرتان څخه تر هرات پورې د اوسپنې پټلۍ غځولو پروژې لومړني مطالعات پيل کړي او همدا راز به د ازبکستان د افغانستان د کرنيزو محصولاتو د صادراتو په برخه کې شته محدوديتونه لرې کړي.
افغان پلاوي له ازبکستاني لوريو سره دغه راز افغانستان ته په واردېدونکې برېښنا هم بحث کړی او ټاکل شوې راتلونکی کال ازبکستان د برېښنا کچه ډېره او تعرفه کمه کړي.