د اقتصاد وزارت وایي، د دغه وزارت سرپرست قاري دین محمد حنیف کابل کې د اندونېزیا له شارژدافیر ناندا اوالیست سره کتلي دي.
د وزارت د خبرپاڼې لهمخې، د اندونیزیا شارژدافیر په دې کتنه کې د خپل هېواد له لوري له افغانستان سره د اقتصادي او سوداګریزو اړیکو د پراختیا، په افغانستان کې د اندونیزیایي شرکتونو د پانګونې چمتوالي او د افغان او اندونیزیایي سوداګرو ترمنځ د ګډې سوداګرۍ او صنعت خونې د جوړولو لپاره لېوالتیا ښودلې.
ورته مهال د اقتصاد وزارت سرپرست په دې کتنه کې د افغانستان د اقتصادي ظرفیتونو، فرصتونو او د بهرنیو پانګونو د جذب لپاره د لازمو اسانتیاوو په اړه خبرې کړي دي.
دغه راز ښاغلي حنیف، د سوداګرۍ او پانګونې په برخه کې د اندونیزیایي شرکتونو همکاري په افغانستان کې د اقتصادي ودې او د کاري فرصتونو په رامنځته کولو کې مهمه بللې ده.