د رويټرز خبري اژانس د راپور له مخې د امریکا نوي ټاکل شوي ولسمشر ډونالډ ټرمپ د دغه هېواد دفاع او کورني امنیت وزارتونو ته امر کړی چې، ګوانتانامو زندان کې د ۳۰ زره ناقانونه او مجرمو کډوالو لپاره ځای جوړ کړي.
راپور زياتوي چې کیوبا کې د امریکا پوځي اډې له وړاندې لا د کډوالو د نیولو مرکز درلوده؛ خو د پولو په برخه کې د ټرمپ سلاکار ویلي چې، دغه مرکز به نور هم پراخ کړای شي.
ټرمپ د امريکا امنيتي ادارو ته په خپل امر کې ويلي «تر ټولو بد مجرم کډوال چې، امریکا ته ګواښ پېښوي ګوانتانامو ته ولېږدوئ».
د يادونې ده چې واک ته د ټرمپ له رسېدو وروسته په ټوله امريکا کې د غير قانوني کډوالو د نيولو لړۍ پيل شوې ده.