د امریکا د دفاع وزارت یا پنټاګون وايي، د دوی ارزونې ښيي چې د دغه هېواد بریدونو د ایران اټومي پروګرام پوره ختم نه کړ او ممکن د څو میاشتو لپاره ځنډول شوی وي.
پنټاګون وايي، د امریکا هوايي بریدونو یواځې د اټومي بټیو ودانۍ زیانمنې کړې، د بډایه یورانیو زېرمه په بمبار کې له منځه نه ده تللې او سانتریفیژونه هم تر ډېره روغ پاتې دي.
له بل پلوه پنټاګون کې سرچینو سي بي اېس ټلويزيون ته دا هم ویلي، چې ایران له بریدونو مخکې ځینې یورانیم بل ځای لېږدولي دي.
په ورته وخت کې د امریکا له بریدونو څو ساعته وروسته د ایران ولسمشر هم وویل، چې یو نږدې دوست هېواد یې شپږ ورځې مخکې د حساسو موادو د لېږد سپارښتنه ورته کړې وه او دوی له بمبارد وړاندې خپل اټومي سايټونه خالي کړي وو او د پام وړ زيان نه دی وراوښتی.
سپینه ماڼۍ بيا د پنټاګون دا ارزونه ردوي او وایي، لکه څنګه چې ولسمشر ټرمپ وايي، د دوی دوه ورځې مخکې برید کې د ایران اټومي پروګرام ختم شو.
ياده دې وي، چې امریکا څو ورځې وړاندې د B-2 پرمختللو بم غورځوونکو الوتکو پرمټ د ایران پر فردو، نطنز او اصفهان بطنز او اصفهان بټیو برید وکړ او ورپسې د دغه هېواد ولسمشر ډونالډ ټرمپ وویل چې د ایران اټومي بټۍ یې په بشپړ ډول له منځه وړي.