محمد فیصل
په ۲۰۲۱ کې له افغانستانه د امریکایي اشغالګرو له وتلو وروسته چې طالبان واک ته ورسیدل، نو له ډیرو ستونزو سره مخ وو.
له بهرنیو اړیکو نیولې تر بهرنۍ پانګونې او امنیتي ستونزو سربیره ګڼې ستونزې او اندیښنې موجودې وې.
خو له نږدې دریو کلونو وروسته وضعیت د افغان حکومت په ګټه دی او هغه اندیښنې چې د طالبانو واک ته رسیدو په لومړیو کې موجودې وې، اوس تر ډیره یا له منځه تللي او یا کمې شوې دي.
د امریکایانو (غربیانو) له وتلو وروسته چې کومه سیاسي تشه رامنځته شوه، هغه د روسانو او چینانو له لوري ډکه شوې ده.
سره له دې چې ټولې غربي نړۍ افغانستان ته شا کړې، سفارتونه یې تړلی، په یو او بل نوم فشارونه واردوي او د افغانستان شتمنۍ یې کنګل کړي، خو روسیې او چین افغانستان یوازې پرینښود او د افغان حکومت سیاسي او اقتصادي ملاتړ ته رامخکې شول.
روسیې او چین د اسلامي امارت د تیر حاکمیت برعکس دا ځلې طالب دیپلوماتان ومنل او چین خو تر دې بریده مخکې ولاړ چې په بیجینګ کې یې په رسمي ډول افغان سفیر ومانه او د چین ولسمشر یې باور لیک ترلاسه کړ.
دغه راز یې کابل ته خپل سفیر بیرته راواستوه.چین په اقتصادي ډګر کې هم د افغان حکومت ژغورنې ته رامخکې شوی. ګڼو چینایي شرکتونو له افغان حکومت سره د کانونو ایستلو او نورو برخو کې تړونونه لاسلیک کړي دي.
روسیه او چین چې له سړې جګړې وروسته سوکه سوکه له امریکا سره د تقابل سیاست ته ننوتي، دواړو د نږدیوالي له امله په نړۍ د امریکا یکه تازي ننګولې ده.د چین او روسیې نږدې کیدو په اسیا او تر څه بریده په اروپا کې د امریکا په مشرۍ د غرب هژموني تر پوښتنې لاندې راوستې.
د دغو لورو تر منځ له تقابل څخه افغان حکومت ته فرصت په لاس ورغلی چې له وضعیت څخه د افغانستان په ګټه استفاده وکړي.
مالومیږي چې افغان حکومت وضعیت درک کړی او چین او روسیې ته په نږدې کیدو سره غواړي افغانستان له سیاسي او اقتصادي بحرانونو وژغوريبلخوا روسیه او چین هم افغانستان ته په نږدې کیدو غواړي خپلې ځینې موخې ترلاسه کړي.
افغان حکومت کولی شي په سیمې او نړۍ کې له حاکم وضعیت څخه د ګټورې بهرنۍ پالیسۍ پلي کولو له لارې افغانستان یو قوي موقف ته ورسوي.