په هېواد کې له لسیزو جګړو وروسته سرتاسري امن حاکم شوی دی، د تېرو څو اخترونو په څېر د اختر دا ورځې هم له کومې امنیتي پېښې پرته تیرې شوې. د خوښیو دا ورځې به د امریکایي یرغلګرو په شتون کې د بې ګناه ولسي وګړو په بمبارد، چاپه او وژنو تیریدلې، خو اوس پکې امن، ثبات او سوکالۍ وزرې غوړولي دي.
امن اختر ثابته کړل، چې افغانان له پردیو جګړو ستړي شوي، له شریرو عناصرو، جګړه خوښو کړیو، مزدورو څهرو، نیابتي ډلو او هرې فتنې څخه بیزار دي، په څنګ کې یې نه دریږي، لپاره یې قربانۍ څه، چې همکارۍ ته یې لا هم تیار نه دي، دوی په واقعي توګه افغانستان ته ژمن او د افغانستان واقعي دښمنان پیژندلي او تفکیک یې کولی شي.
د سرتاسري امنیت له برکته هر اختر هېوادوال د هېواد له شماله جنوب، له جنوبه، شمال او جنوب ختیځ، له ختیځه، لویدیځ او نورو سیمو ته سیاحتي سفرونه کوي او د هېواد ښکلاوې ننداره کوي.
د امن او ثبات دوام په افغانستان کې د اقتصاد په شمول، د هېواد ټولې اړینې برخې په واقعي بڼه رغوي، استحکام ورکوي او د زیربنایي کارونو لپاره په تدریجي توګه لار هواروي. د امن او ثبات د دوام په برخه کې نه تنها سرپرست حکومت، بلکې ولس هم مسؤلیت لري او د دوام لپاره یې په دوامداره توګه ګډو همکاریو ته اړتیا لري.
امن اختر وښودل چې په افغانستان کې د سرپرست حکومت د مخالفو ډلو د شتون او مزاحمت په اړه ادعاوې د تبلیغاتو په حد کې دي، تنها د ټولنیزو رسنیو پر مخ دي او هیڅ واقعیت نه لري؛ ولس هم د مخالفو ډلو اصلي ماهیت درک کړی او هیڅ راز باور نه پرې کوي.
همدا شته سرتاسري امن د همدې افغان مؤمن او مجاهد ولس د بې شماره ستړیاوو، قربانیو او هڅو ثمره ده، همدا ولس به دا امن، سوکالي او ثبات ساتي، هیڅ مخالف فرد، کړۍ، ډلې یا جهت ته به اجازه ورنکړي چې اشوب رامنځ ته کړي او امن اخلال کړي؛ د دغه افرادو، کړیو او ډلو ټولې هڅې ناکامې شوې دي او هره شومه اراده یې په نطفه کې خنثی شوې ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
