د اوکراين ولسمشر ولادیمیر زيلينسکي ویلي، چې د دغه هېواد په شمال ختیځ کې د اوکرایني ځواکونو پر ضد بهرني کرايي جنګیالي جنګېږي چې له چین، پاکستان، تاجکستان، ازبکستان او یو شمېر افریقایي هېوادونو څخه جذب شوي دي.
نوموړي خبرداری ورکړی، چې دې کار ته به سخت غبرګون وښيي.
زيلينسکي همدا راز پر خپله اېکس پاڼه لیکلي:«زموږ جنګیالي راپور ورکوي، چې د چین، تاجکستان، ازبکستان، پاکستان او یو شمېر افریقایي هېوادونو کرايي عسکر زموږ پر خلاف جګړه کې برخه لري.»
په ورته وخت کې رویټرز خبري آژانس وايي، چې په کييف کې یې د تاجکستان، ازبکستان او پاکستان سفارتونو ته د نظر اخیستو لپاره اړیکه نیولې، خو تر دې دمه یې ځواب نه دی ترلاسه کړی.
ياده دې وي، چې روسیې هم تر اوسه د زيلينسکي څرګندونو ته کوم رسمي غبرګون نه دی ښودلی.