تسنيم خبري اژانس راپور ورکړی، چې د ایران امنیت وزارت په يوه بيان کې ویلي، چې د لوېدیځو استخباراتي ادارو لخوا د ایران نظام نسکورولو او د رضا پهلوي په مشرۍ د يوه «لاسپوڅي او ګوډاګي» دولت جوړولو پراخه توطیه یې شنډه کړې ده.
ياد وزارت ویلي، اسرائيلو سره ۱۲ ورځنۍ جګړه یوازې یوه پوځي نښته نه وه، بلکې یوه داسې هر اړخیزه حمله وه چې پوځي، امنیتي او استخباراتي اړخونه یې درلودل. د بیان له مخې، د دې برید موخه دا وه چې ایران تر فشار لاندې راولي، نظام نسکور کړي، جغرافیوي تجزيه رامنځته کړي او داخلي ګډوډۍ ته لمن ووهي.
د ايران امنيت وزارت ادعا کړې، چې دا توطیه د امریکا، اسرائیل، ځینو اروپايي هېوادونو او نورو عناصرو په همکارۍ جوړه شوې وه.
د ياد وزارت په بيان کې راغلي، چې د جګړې په ورځو کې د ایران د ۲۳ لوړپوړو چارواکو د ترور هڅې ناکامې شوې، او همداراز د تېرو میاشتو په ترڅ کې هم ۱۳ نورې دسیسې شنډې شوي، چې ټولټال یې شمېر ۳۵ ته رسېږي.