لیکوال: عادل افغان
د ایران او اسرائیل ترمنځ ظاهراً دښمني او یو او بل ته اخطارونه ورکول اوږده مخینه لري او ريښه یې په منځني ختیځ کې د برېټانوي ښکېلاک له خوا په فلسطین کې په زور سره د اسرائیل یهودي دولت جوړېدو ته ورګرځي.
د ایران او اسرائیل اړیکې د تاریخ په اوږدو کې له لوړو او ژورو ډکې وې. په ایران کې واک ته د اوسني اسلامي انقلاب د زمامدارانو له رسېدو وړاندې دا اړیکې ښې وې او ان په ډېرو برخو کې یې له یو او بل سره همکارۍ درلودې، خو دا اړیکې په ایران کې د اسلامي انقلاب له واک ته رسېدو سره سم پیکه شوې او هغه پخوانۍ د دوستۍ نرمه ژبه د تل لپاره په سخته او له اخطارونو او ګواښونو ډکې ژبې بدله شوه.
د ایران اسلامي انقلاب د یهودي دولت له جوړېدو او بیا د دغه دولت د پولو له پراخېدو سره خپل مخالفت څرګند کړی، د ملګرو ملتونو د عمومي ناستو په ګډون یې په نړیوالو ستېجونو هر ځای د یهودي دولت پر وړاندې پر خپل مخالف دریځ ټینګار کړی. خو پوښتنه دا ده، چې ایا دا هرڅه رښتیا هم له اسرائیل سره د واقعي دښمنۍ په مانا دي؟ ایا دغه څه به اسرائیل له بشریت ضد جنایتونو راوګرځوي؟ ایا ایران په دې وروستیو کې اسرائیل ته درس ورکوونکی ځواب ویلی شوای؟ دا خبره د لمر په څېر روښانه ده چې اسرائیل په منځني ختیځ کې د امریکا سیوری او د ټول منځني ختیځ او دغه راز اسلامي نړۍ لپاره سرطاني دانه ده.
اسرائیل د امریکا او غرب له مستقیم ملاتړه برخمن دی، وسلې، پیسې، الوتکې، توپونه، ټانګونه، عصري ټکنالوژي او هر ډول امکانات ورته غرب برابر کړي او برابروي، په نړیوالو سټېجونو او محاکمو کې ترې دفاع کوي او د هر ډول جنایت لپاره یې توجیه لټوي، ان په ځينو وختونو او سختو شرایطو کې د امریکا، برېټانیا، جرمني، فرانسې، ایټالیا او نورو غربي هېوادونو استخبارتي او ځانګړي ځواکونه د اسرائیلو له عسکرو سره اوږه په اوږه په جګړو کې برخه اخلي.
په ورته مهال اسرائیل د عرب لاسپوڅو نظامونو له مرستو، تېلو، انرژۍ، اوبو، پټو او ښکاره اړیکو او هر ډول امتیاز څخه هم برخمن دی، نو ځکه په دومره جرئت سره یې په فلسطین کې د مظلمونو مسلمانو عام وژنه روانه ساتلې ده.
پر اسرائیل د حماس برید د هغو جنایتونو او ظلمونو غبرګون و، چې دا څو لسیزې یې یهودي دولت د فلسطین پر بې دفاع او مظلوم ملت کوي.
اسرائیل له نږدې پنځوسو کلونو راهیسې هره ورځ د فلسطین ماشومان، مېرمنې، بوډاګان او بې ګناه انسانان شهیدانوي، خاوره یې اشغالوي او یهودي مېشت ځایونه پکې جوړوي، خو په مقابل کې یې عرب مزدور او خائن مشران په خپلو بنګلو کې له اروپا څخه له راغلو فاحشو نجونو سره خپلې نشې او تماشې کوي، هره ورځ نوې شراب خونې پرانیزي او مزو او چړچړو یې دومره سترګې ړندې کړي، غوږونه کاڼه کړي، حواس یې فلج کړي چې په خپل څنګ کې هره ورځ د بمونو او باروتو په اور کبابېدونکو فلسطیني مسلمانانو غږ نه اوري.
په تېرو شپږو میاشتو کې اسرائیلي جنایتکارو عسکرو نږدې ۳۵زره فلسطینان شهیدان کړي، تر ۵۰ زرو ډېر یې ټپیان کړي او په میلیونونو نور یې بې کوره کړي، دې هرڅه نه د عرب ظالمو مشرانو وجدان ويښ کړ، نه یې د ترکانو، ایران چې څه روان کړي، هغه هم تر ډېره نمایشي دي، لاپې دي چې د فلسطین د مظلوم ملت هرڅ درد نه شي دوا کولی. له شک پرته چې ایران په اسلامي هېوادونو کې پیاوړی پوځ او پرمختللې وسلې او امکانات لري، خو له اسرائیل سره یې وروستۍ تورې سپینې او لوړې ژورې خبرې هسې د موږک او پیشو کیسه ده.
د فلسطیني ملت درد یوازې تر فلسطینه محدود نه دی، فلسطیني ملت د ټولو مسلمانانو د لومړي مقدس ځای او قبلې ( بیت المقدس) د دفاع لپاره ولاړ دي او د خپل ځان وینې ورته نذرانه کوي، د دوی په مقابل کې نه یوازې په پرمختللو وسلو او معاصرۍ ټکنالوژۍ سمبال یهودي پوځ ولاړ دی، بلکې دوی له ټول غرب، امریکا، اروپا او ناټو سره ډغرې وهي، هماغه ډول لکه په افغانستان کې چې طالب شازلمي یې په مقابل کې ودرېدل.
د فلسطین د مظلمونو مسلمانانو او مقدسې خاورې دفاع پر هر مسلمان لازمه ده، په ځانګړې توګه هغه اسلامي حکومتونه چې پیاوړی پوځ او امکانات لري، دا که ترکیه ده، که سعودي دی، که مصر دی، که ایران دی او یا هم نور، خو اصلي خبره دا ده چې دغه هېوادونه لا هم د غرب او امریکا په خدمت کې دي، امریکا او غرب ته یې هرڅه ورپرېښي، په خپلو هېوادونو کې یې پوځي اډې ورکړي او له ټولو امکاناتو یې امریکا په خلاص لاس او ډاډه زړه استفاده کوي.
د فلسطیني ملت او په ټوله کې د اسلامي امت درد هغه مهال دوا کېږي چې د اسلامي امارت او د افغانستان د ولس په څېر لومړی د خپلو اوسنیو غلامو حکومتونو په مقابل کې راودېږي، خپل ځانونه د امریکا او غرب له غلامۍ راخلاص کړي، امریکايي اډې له خپلو هېوادونو وباسي او پر خپلو امکاناتو خپله ولکه ټينګه کړي، بیا به خدای تعالی هم دوی ته عزت ورکوي، هم به یې خاورې ازادېږي، هم به خپل امکانات په خپل اختیار کې اخلي، هم به دین او اسلامي شریعت تطبیق کولی شي او هم به بیا د اسرائیل په څېر د امریکايي او انګرېزي پروژو مخه نیسي.
هم به د خپل مسلمان ورور دفاع کولی شي. همدا یوازینۍ لاره ده، همدا یوازینۍ لاره ده، چې له اسراییل څخه خپلې مقدسې خاورې بېرته راخپلې کړو، د غرب پروژې ناکامې کړو او خپل برم او عزت ترلاسه کړو. بیا به نه یهودي او نه هم نصراني په دومره ډاډه زړه زموږ مسلمان وروڼه، خویندې په ډاډه زړه سره په ډلهییزه توګه شهیدانولی شي.
بیا به د هر انسان څه چې د ونې او بوټي حساب هم ورسره کېږي.