په افغانستان کې د اشغال د شلو کلونو پر مهال د ځانګړو بریټانوي ځواکونو یو شمېر پخوانیو سرتېرو د بي بي سي له خوا په یوه خپره شوې څېړنیزه راپور کې اعتراف کړی چې د خپلو ماموریتونو پر مهال یې په بېلابېلو ولایتونو کې ماشومان، ښځې او بېګناه نارینه شهیدان کړي دي.
په دغه راپور کې شاوخوا دېرشو پخوانیو عسکرو د هغو بوږنوونکو پېښو پرده پورته کړې چې تر دې وړاندې یې د چوپتیا پرده پرې غوړولې وه. دوی وایي، د عملیاتو پر مهال به یې داسې خلک هم وژلي چې له جګړې سره یې هېڅ تړاو نه درلود.
د دغو ځواکونو له ډلې یو پخواني سرتېري ویلي:«موږ یو ماشوم چې حتی د جګړې سړی نه و، ولچک کړ او بیا مو وویشت. که به یو هدف موږ ته دوه یا درې ځله راکړل شو، نو بیا به مو د وژلو لپاره ورتلل، هېڅکله به مو څوک ژوندی نه پرېښود.»
دغه عسکر زیاتوي:«وژنه زموږ په عادت او حتی په اعتیاد بدله شوې وه. کله به مو مېلمستون ته ورته ودانیو ته ننوتل، او هلته به مو په خوب ویده خلک وژل. ځینې سرتېري به له کوم هدف پرته کوڅو ته وتل، هر څوک به یې ویشتل، او بیا به یې ټپیان وکتل، که ژوندی به و، نو هغه به یې هم وژلو.»
د دوی په اعترافونو کې راغلي چې دوی به له ځان سره مصنوعي لاسي بمونه او وسلې وړلې، او د وژل شویو بېګناه خلکو تر څنګ به یې ایښودې، ترڅو انځورونه ترې واخلي او ځان ته د «قانوني وژنې» توجیه پیدا کړي.
دغو پخوانیو عسکرو دا هم منلې چې په یو عملیات کې یو افغان ډاکټر چې یو ټپي تن یې درمله کاوه، د یوه بریټانوي سرتېري له خوا په سر وویشتل شو، حال دا چې ټپي کس لا هم ژوندی و.
د راپور له مخې، یوه عسکر اعتراف کړی چې یواځې په شپږ میاشتني ماموریت کې یې تر دولسو زیات افغانان وژلي دي.