د رویټرز خبري اژانس د راپور له مخې، د امریکا د کانګرس دوه غړي د جمعې په ورځ دمشق ته رسېدلي ترڅو د سوریې له چارواکو سره وګوري.
دې جګړه ځپلي هېواد ته د بشارالاسد حکومت له نسکورېدو وروسته دا د امریکا د کانګرس د استازو لومړی سفر دی.
د متحده ایالاتو د فلوریډا استازی کوري ملز او د انډیانا مارلین سټوټزمن، دواړه د ولسمشر ډونالډ ټرمپ د جمهوري غوښتونکي ګوند غړي دي.
د پلاوي یوه کس ویلي، ملز د جمعې په شپه د سوریې له نوي ولسمشر احمد الشرع سره وکتل. د دوی غونډه ۹۰ دقیقې وه او دوی د امریکا په بندیزونو او پر ایران خبرې وکړې.
یوې سرچینې ویلي، ټاکل شوې چې سټوټزمن د شنبې په ورځ له الشرع سره وویني، چې لا هم له القاعدې سره د خپلو پخوانیو اړیکو له امله د امریکا او ملګرو ملتونو تر بندیزونو لاندې دی.