د بغلان، بدخشان، غور، تخار او فاریاب وروستیو سېلابځپلو سره بېلابېلو ادارو او اشخاصو مرستې اعلان کړي دي.
افغان سوداگر میرویس عزیزې پر خپلې اېکسپاڼه لیکلي، چې د عزیزي بنسټ له لوري ۵۰ مېلیونه افغانۍ مرستې به د بغلان سېلابځپلو سره وکړي.: «په بغلان او د افغانستان په ځینو نورو برخو کې د سېلابونو له امله رامنځته شوي ځاني تلفات او پراخه ورانۍ د ډېرې خواشینۍ وړ دي.
زه په داسې حال کې چې د دې طبیعي ناورین له امله متأثره شوو کورنیو ته د زړه له کومي تسلیت وړاندې کوم، غواړم چې د عزیزي بنسټ لهخوا له مستحقو هېوادوالو سره عاجلې بشري مرستې وشي.
همداراز، د عاجلو مرستو د رسولو په خاطر مې پنځوس مېلیونه افغانۍ تخصیص کړې او خپل ورور همایون عزیزي نه مې وظیفه سپارلې تر څو مرستندویه هیات ژرترژره بغلان ته واستوي.»
د عزیزي سربېره د افغانستان د کرېکټ ملي لوبډلې لوبغاړي راشدخان هم ۱.۵ مېلیونه افغانۍ مرستې اعلان کړی دی. نوموړي پر خپلې فېسبوکپاڼه لیکلي: زه د بغلان د سېلاب ځپلو وطندارانو سره ۱۵لکه افغانۍ مرسته اعلانوم.
دا مرسته به زما د خیریه بنسټ له لوري په اړمنو باندې وېشل کېږي. موږ به هره ورځ ۱۰۰۰ سېلابځپلو ته پاخه شوي خواړه او غذ برابرو او دا به د ۱۵ ورځو لپاره وي. : «هیله ده تر هغه وخت پورې نور مرسته کوونکي هېوادوال هم لاس په کار شي. بیا هم په ټولو غږ کوم چې په دې بد وضعیت کې د خپلو هېوادوالو سره مرسته وکړي. خدای دې بیا داسې بد وضعیت نه راولي. »
نوموړي همدا راز له هېوادوالو غوښتي، چې د بغلان خلک یوازې پرې نهږدي او په دې سخت حالت کې ورسره مرستې وکړي.: «د بغلان د غمجنې پېښې په اړه خبر شوم. ډېر یې ودردولم. خدای دې شهیدانو ته جنتونه ورکړي او زخمیانو ته کامله شِفا غواړم.
زه تاسو سره په دې لوی غم کې شریک یم. ان شاءالله تر خپل وس به کوشش کوو چې مرستو ته ځانونه ورسوو.
په ټولو هېوادوالو غږ کوم چې په دې بدې ورځې کې خپلو وطنوالو ته لاس ورکړي. شتمن هېوادوال باید ډېر څه وکړي.»
د پاکستان په سوپرلیگ کې د پېښور زلمي لوبډلې څښتن جاوېد افریدي بیا له افغان سېلابځپلو سره د ۱۰ مېلیونه پاکستانیو کلدارو د مرستې اعلان کړی.
د ریاست الوزراء اقتصادي مرستیال هم بېړنۍ غونډه کړې او په بغلان، غور، بدخشان، فاریاب او تخار ولایتونو کې د سېلابونو له امله زیانمنو هېوادوالو ته د بېړنیو مرستو رسولو په موخه د کورنیو چارو وزارت، اقتصاد وزارت، روغتیا وزارت، پېښو ته د رسېدو په چارو کې د دولت وزارت او سرې میاشتې په مشرۍ په ترتیب سره د نجات، مرستو د جلب او جذب، روغتیا او ټپیانو ته د رسېدنې، د تکفین او تدفین او د خوراکي توکو د چمتو کولو او رسولو کمېټې جوړې شوې.