د ناکامه او نامراده ائتلافونو په تسلسل کې یو ځل بیا د تښتېدلو او رټل شویو سیاسونو لخوا یو ګډ ائتلاف ظهور وکړ. له دې وړاندې د سیاف، قانوني، دوستم، عطا محمد نور، محقق او نورو په ګډون د شر او فساد شورا تر عنوان لاندې یوه مجموعه جوړه کړې وه، خو د خپل منځي اختلافاتو له امله یې یاد وشړېده.
بیا یې د انلاین ناستو له لارې د بلې اجماع د جوړېدو هڅې وکړې، خو صلاح الدین رباني او عطا محمد نور د احمد مسعود په مشرۍ هر جریان مردود وګاڼه او ادعا یې وکړه چې د احمد مسعود تر رهبرۍ لاندې د هیڅ کوم جریان برخه نه یو. بلکې عطا محمد نور، احمد مسعود ته د وراره او زوی خطاب وکړ، یعنې احمد مسعود ته یې وښودل، چې ته مې د زوی هومره یې، نو زه څنګه د خپل زوی تر شا روان شم!؟
اوس تادین خان، دوستم، محقق، احمد مسعود او نورو په ګډون نوی خیالي ائتلاف “د افغانستان د ژغورنې ملي مجمع” په نوم اعلان کړ، دغه مجمع د شر او فساد شورا په نسبت پراخه ده او د دوی په وینا کابو پنځلس سیاسي جریانونه په کې شامل دي؛ هغه بې اغېزې جریانونه چې تر دې وخته یې یوازې نوم شته.
کله چې افغانستان کې له امریکا سره د طالبانو اړیکې خړې پړې شي، بیا نو یادو پخوانیو سیاسیونو ته د یوې خولې خندا او مجلس فرصت په لاس ورشي، خو ډیری وخت یې دغه مجالس د اختلافاتو له امله د یو او بل په توهین او خپګان پای ته رسېدلي دي.
د غه منفور چارواکي غواړي په مطبوعاتي مانورونو د امریکایي چارواکو او غربیانو پام ځان ته واړوي او هغوی ته وښيي، چې دوی د افغانستان اغیزمنې او با نفوذه څهرې دي.
عبدالرب رسول سیاف چې د دې جریان یو غړی دی، په خپلو خبرو کې وویل، چې د دې ائیتلاف هر غړی په افغانستان کې قوي ريښې لري، که دوی وغواړي خپلو پلویانو ته غږ وکړي چې د مدني نافرمانۍ په موخه واټونو ته ووځي، له ټوپک پرته به یې د طالبانو واکمني ختمه کړې وي. سیاف دا ادعا په داسې حال کې کوي، چې د جمهوریت د پرځېدو تر ورځې له محدود شمېر خلکو پرته، مؤمن او مجاهد ولس د همدې سیاسونو په مشري جوړ جمهوریت وپرځاوه او سیاسیون د ولس د محاکمې له وېرې وتښتېدل.
دا تښتېدلي سیاسیون نه ريښې لري، نه سیاسي او اجتماعي اړیکې؛ نه سیاسي نفوذ لري او نه هم ولس ته منلي دي. د “ملي” تر عنوان لاندې شخصي ائتلافونه یوازې د بهرنیانو د پام اړولو په موخه جوړوي، څو ورځې بې نتیجې مجلسونه کوي او بیا هر یو پر خپله مخه ځي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.