نوین ساپی
تبلیغاتي جګړه ډېر زیانونه لري چې مستیقماً د خلکو په روح او روان باندې تاثیرات پرېباسي؛ د وېرې او وحشت خورولو لپاره زمینه سازي کوي، د یوه فعالیت د ترسره کولو پر وړاندې خنډونه زېږوي، په راتلوونکي باور له منځه وړي، هیلې او امیدونه وژني، د ټولنې ایدیالوژیکي، مذهبي، تاریخي، فلسفي او علمي برخې په بر کې نیسي. د دې جګړې اصلي وسلې د تېرایستنې په موخه د حقایقو اړول او د ناسمو اطلاعاتو ورکول دي.
که د هیواد په سطحه وکتل شي، تر ډېره هغه مغرضې کړۍ، ډلې ټپلې غیرې معیاري تبلیغات کوي چې تفرقه رامنځته کړي، د عوامو او دولت ترمنځ درز و غورځوي.
که مونږ دې ته زیر شو، رسنیزه تبلیغاتي جګړه د اسلامي امارت پر وړاندې د داخلي او بهرني دښمن یو بله هڅه ده، چې وخت ناوخته د نظام پر وړاندې منفي پروپاګند کوي، غلطه ذهنیت سازي کوي، بې حیایي او فحشا ته لمن خوره وي.
تبلیغاتي جګړه له ډېرو پخوا زمانو راهیسي دود ده، خو د شلمې پېړۍ په اوږدو کې دا لړۍ ډېره پراخه شوه، که په پیل کې یواځې چاپي لیکنې وې، وروسته رادیو او تلویزون ورسره یوځای شو، نن سبا مالوماتي تکنالوژي هم یوه ډېره اغېزناکه وسله ګرځېدلې ده؛ هیوادوال باید په دې اګاه ووسي، د یو شمېر رسنیو په خبرونو، فلمونو، غږیزو او انځوریزو کلیپونو، په دوه مخې چلند باندې قضاوت ونه کړي، چې د هغې له جملې، څخه د افغانستان انټرنېشنل، امو، ازادۍ او دې ته ورته نورې رسنۍ دي چې د بهرنیانو په اشارې تبلیغاتي جګړې پر مخ بیایي، په نشراتو یې باید باور ونه کړای شي.
غرب په نړۍ کې هر ډول نظامونه زغمي، شاهي او سلطنتي، جمهوري او دیموکراتیک، مذهبي او غیر مذهبي، بې دینه او سیکولر، دا ټول موږ وینو چې نړۍ کې شته، غرب ورسره کومه ستونزه نلري؛ راکړه ورکړه او تعامل هم ورسره لري، په رسمیت یې هم پېژني، خو په دې دومره لویه نړۍ کې او د دومره لوی شمېر مسلمانانو باوجود د نړۍ په یوه څنډه کې هم اسلامي نظام نشي زغملی.
که د سیاست له اړخه وګورو، هغه هیوادونه چې له یوه او بل سره سیاسي اختلافات لري، لومړی له تبلیغاتي جګړې څخه کار اخلي، خپل ټول نظامي تجهیزات د مطبوعاتو په حضور کې نندارې ته وړاندې کوي، یعنې خپل زور او طاقت ورته په ډاګه کوي، په یوه نه یوه ډول مقابل لوری خپل تر تاثير لاندې راولي.
کله چې د یوه هېواد د اتباعو یوه برخه د خپلو نورو هېواد والو په شان د ملي او فرهنګي ارزښتونو دساتلو په تړاو یو شان نظر ونلري، نو دولت او ټولنه د بحران په لور درومي او د پردیو د لاسوهنې لپاره زمینه برابریږي.