هندوکش غږ ته د رسېدلو اسنادو له مخې د پرځېدلي جمهوریت پر مهال د بلخ والي عطامحمد نور، چې د هېواد په شمال کې یې واک خورا پراخ و، د طالبانو په وړاندې د ناسمې ذهنیت جوړونې او تبلیغاتو لپاره په بلخ ولایت کې له دولتي امکاناتو څخه په استفادې ښوونځي الوزولې.
دا اسناد په داسې حال کې افشاء شوي، چې د عطامحمد نور په شمول له هېواد څخه بهر مېشت سیاسیون او پخواني چارواکي چې د عامه شتمنیو په له منځه وړلو کې یې خورا مهارت درلود، په ځلونو طالبان له عامه شتمنیو سره په دښمنۍ او تخریب تورن کړي او هر ځل یې د مکتبونو، پلونو، پلچکونو او عامه شتمنیو له منځه وړل د دغه غورځنګ کار باله، خو واقعیت بیا دا و چې د عامه شتمنیو له منځه وړل د پرځېدلي جمهوریت د چارواکو له خوا د ناسمې ذهنیت جوړونې په موخه ترسره کېدل.
د طالبانو غورځنګ، چې اوس مهال پر ټول هېواد حاکمیت لري او سرپرست حکومت یې ایجاد کړی، د خپل غورځنګ د راټوکولو له لومړیو یې په هېواد کې خائنانو په وړاندې مبارزه را پیل کړې وه، له هماغه لومړیو یې جګړې ولسي رنګ خپل کړی و. کله چې امریکا او متحدینو یې افغانستان اشغال ګړ، د طالبانو تحریک بیا هم د ولسي ښکېلتیا او ملاتړ له امله په ټول هېواد کې وسلواله مبارزه کول.
د طالبانو جګړې یو سپېڅلی رنګ خپل کړی و، له همدې امله یې د افغان مؤمن او مجاهد ولس له خوا په ټولو سیمو کې پراخ ملاتړ کېده، همدې ملاتړ امریکا، ناټو او کابل اداره د جګړې په ډګر کې ننګولي وو، چې له امله یې بالاخره شل کلن رژیم سقوط شو، مګر د بهرنیو ځواکونو او داخلي اجیرانو یوازینۍ هغه لار چې بقاء یې په کې تر یو حده خوندي کېدل، د طالبانو په اړه ناسمه ذهنیت جوړونه او تبلیغات وو.
د تبلیغاتو لپاره د پرځېدلي جمهوریت پر مهال له ټولو حربو او ابزارو استفاده کېدل، خو د تبلیغاتي سوژو د برابرولو په هدف د عامه شتمنیو، په ځانګړې توګه د ښوونځیو الوزول یو نه بښونکی جنایت او له افغانستان سره یو نه هېرېدونکی خیانت دی؛ تاریخ به هم د پرځېدلي جمهوریت د تورو څهرو دغسې جنایات په خپلو پاڼو کې ثبت ساتي او له دې خاورې سره د خائنینو په نوم به پیژندل کېږي.
له ملي شتمنیو سره د تښتېدلو چارواکو نه هېرېدونکي خیانتونه لا هم د ولس په اذهانو کې پاتې دي، هیڅکله به دغه جنایت کارانو ته اجازه ورنه کړي چې بیا ځل د پردیو په مرسته پر هېواد د خپل حاکمیت سیوری وغوړوي او د ملي شتمنیو لوټ، تالان او له منځه وړلو ته زمینه مساعده شي.
تښتېدلي سیاسیون او چارواکي د خپلو همدې باطلو کړنو له امله منفور شوي؛ اوس چې له هېواد بهر د ځان په ګټه هر څومره مثبت تبلیغات وکړي، کوم ځای نه نیسي او نشي کولای د افغان ولس په زړه کې ځای ونیسي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.