د افغان کابینې په وروستۍ غونډه کې د نورو موضوعاتو سربېره په هېواد کې د وروستیو ترافیکو پېښو په ډېرېدو هم بحث شوی دی.
له ارگ څخه په خپره شوې خبرپاڼه کې ویل شوي، د کابینې په ۱۹مه غونډه کې د ترافيکي پېښو مخنيوي او موټرو د سرعت کنټرول په اړه تفصيلي بحث وشو او کورنيو چارو وزارت ته دنده وسپارل شوه چې د سترې محکمې، ټرانسپورټ او هوايي چلند او ټولگټو وزارت په گډه د لويو لارو په اوږدو کې د موټرو د تگ او سرعت اندازې معلومولو لپاره ترافيکو ته د اړينو وسايلو چمتو کولو طرحه جوړه کړي او د رياست الوزراء مقام سره دې شريکه کړي.
د خبرپاڼې له مخې، همدارنگه د کابینې په دې غونډه کې د رياست الوزراء اداري مرستيال مولوي عبدالسلام حنفي په مشرۍ د کورنيو چارو، بهرنيو چارو، کرنې، اوبو لگولو او مالدارۍ، کور او ښار جوړولو، د سرحدونو، قومونو او قبايلو چارو وزارتونو، استخباراتو لوی رياست او احصايې ملي ادارې څخه تشکيل شوي پلاوي ته دنده وسپارل شوه چې د ولسوالیو جغرافیوي حدودو تثبیت کړي، په اړه يې معلومات وکړي او راپور يې له توحيد وروسته د رياست الوزراء مقام ته وړاندې کړي.:«د کابينې په دې غونډه کې اقتصاد وزارت ته دنده وسپارل شوه چې مؤسساتو ته واضحه کړي، چې هېڅ امارتي کارکوونکی تر هغو نشي جذبولی، ترڅو يې قانوني موده نه وي پوره شوي.»
د ترافیکو پېښو د کمولو په موخه داسې مهال د یوې طرحې د جوړولو سپارښتنه شوې، چې روانه اوونۍ په هلمند کې د یوې ترافیکي پېښې له امله لسگونه کسانو ته پکې مرگژوبله واوښته.
افغانستان د نړۍ یو د هغو هېوادونو څخه دی، چې گڼې ترافیکي پېښې پکې کېږي او هر کال د ترافیکو پېښو له امله زرگونه کسانو ته مرگژوبله اوړي.