د راپورونو له مخې، د ترکیې په اسکيشهیر ولایت په یو ځنګل کې د اورلګیدنې پر مهال ۱۰ اور وژونکي مړه او ۱۴ نور ټپیان شوي دي.
د ترکیې د کرنې وزیر ابراهیم یومکلي ویلي، چې پېښه د چهارشنبې په ماښام هغه مهال رامنځته شوه، چې چټک باد سیمه کې د اور لوری بدل کړ او ۲۴ اوروژونکي یې محاصره کړل.
نوموړي زیاته کړې، چې ټول اور وژونکي ژر تر ژره روغتون ته ولېږدول شول، «خو له بده مرغه لسو تنو یې ژوند له لاسه ورکړ او ۱۴ نور اوس هم تر درملنې لاندې دي.»
د یادونې وړ ده، چې له تېرو څو ورځو راهېسې ترکیه د ګرمۍ له سختې څپې سره مخ ده او له همدې کبله د دې هېواد په څو لویدیځو او مرکزي سیمو کې ځنګلي اورلګېدنې رامنځته شوې دي.