د افغان حکومت مرستیال ویاند، ملا حمد الله فطرت پر افغانستان د پخواني شوروي اتحاد د یرغل ۴۶مې کالیزې په مناسبت اعلامیه کې ویلي، چې دې یرغل افغانستان له هرې خوا زیانمن کړ، میلیونونه افغانان يې له خپل هېواد څخه هجرت ته مجبور، شهیدان او معیوب کړل.
په اعلامیه کې راغلي، چې زموږ غیورو او مسلمانو خلکو په میړانه سره جهاد وکړ، چې په نتیجه کې يې وروسته له لسو کلونو څخه د شوروي سرو لښکرو په افغانستان کې ماتې وخوړه او خلک يې له شر او اشغال څخه خلاص شول.
اعلامیه کې ټینګار شوی، چې د تاریخ دغه ستره پيښه له یوې خوا دا پيغام لري چې باید د نړۍ هيڅ مغرور ځواک د افغانستان مسلمانو او غیورو خلکو پر ایمان، ننګ او پخې ارادې شک ونه لري.
افغان حکومت یو ځل بیا دغه یرغل غندلی او له ولسه یې غوښتي چې د خپلواکۍ، اسلامي نظام او ملي ارزښتونو د ساتنې لپاره تل چمتو و اوسي.
وړاندې ډاډ ورکړل شوی، چې ا.ا به شپه او ورځ د خپلو دیني ارزښتونو، اسلامي نظام، وطن او مسلمانانو د دفاع لپاره خدمت او هڅو ته دوام ورکوي.