وحيد حیدر
لکه څنګه چې اراده او عزم د بریا لپاره لار برابروي او عزم د کامیابي کيلي ګڼل کیږي، دا خبره یوازې زموږ د فلکور فلسفي رنګ نه لري، بلکې د شرعي تعلیماتو اصل دی. د ایمان په تعریف کې اقرار باللسان او تصدیق بالقلب شرط ګڼل شوی، نو افغانستان کې مبارزینو د ازادۍ جنت ته د سرونو او بچیو د قربانۍ پر قیمت دانګلي، د زندانونو تروږمیو، د زولنو شرنګا، د دارونو پړو یې ایمانونه ونه لړزول او ایمانونه یې د فولادي غرونو په څېر د اورو کُرو ذوب نشو کړای، هر استکبار یې یوازې د تکبیر له ازانګو تس نس کړل.له انګریز ازادي، له روسانو ازادي، له امریکا ازادي مفته او وړیا نه دي تر لاسه شوي، نه هم د وارسا اوسپنیز دېوال او د ناټو اوسپنیز کمربند کوم پلاستیکي کمربند وو، له دې دېوالونو او کمربندونو سره سرونه جنګیدلي، د استکبار نمرودي اور ته ابراهیمي زلمیو دانګلي او فرعوني جابران د موسی غوندې ایمانونو نسکور کړي.خو موږ ګټلي میدانونه په ډیرې بې باکۍ بایللي، زموږ د جهادونو او مبارزو له لاسته راوړنو زموږ ګاونډیان او د سیمې هیوادونه د اټوم او اقتصاد خاوندان کړل.د تونس ستر عالم او د پارلمان رئیس راشدالغنوشي وايي، افغانان د جګړو قهرمانان دي خو د ادارې په سمبالښت کې ناتوانه دي، دا ځل افغانان د غنوشي د توقوع خلاف روان دي، اسلامي امارت لوی استعماري قوتونه د خپلو زلمکیو او ببر څڼو د مټو په زور دلته ښخ کړل، افغانان د ظلم، وحشت او قتل عام له بربریته وژغورل شول، د اشغال د پای په ورځ د اګست پینځلسمه ورځ همهاله ادارې خلاصې شوې، د مراجعینو پر عرایضو کار روان شو، مالي، اقتصادي، رغنیزې او عایداتي چارې پیل شوې، د ښوونځیو زده کوونکو ښوونځيو ته ولاړل، تر مامورینو، شهداوو، ښوونکو او نظامي منسوبینو پورې نه د چا معاش وځنډېده او نه د چا کار.لویې اقتصادي او عایداتي زیربناوې پروژې ډیزاین شوې او په یو مخ تر کار لاندې ونیول شوې، کانالونه، لویې لارې، تونلونه، چکډیمونه، پارکونه، مسجدونه، مدرسې، ښوونځي، د مؤسساتو چوکاټونه جوړول، د سيستمونو ساتل، د افغانیو ثبات، د ډالرو قاچاق مخنیوی، د افغانستان د وسلو او وسیلو خوندي کول.ایا دا کارونه د ظرفیت په نشتون کې مدیریت کیدای شي؟ایا څوک دا دعوه اوس کولی شي چې افغانان د جګړو پهلوانان دي او د ادارې خلک نه دي؟موږ په مخه ځو اسلامي امارت د ټولو جهادي تنظیمونو پوده او فرسوده مفکر له وطنه جارو کړی، دا مجال چاته نه ورکوي چې د جهادونو لاسته راوړنې مسخره کړي، سیمه ایز زورواکي، د واک جزیري، د ګوندونو خرمستۍ، د ډلو ټپلو تغذیه او د لویو لوبو لپاره کمرکشونو تابوتونو باندې افغانانو میخونه ټک وهلي دا ځل یوازې بریا نه ګټو بلکې بریا به ساتو.